ZALEN August 28, 2023 : Vawiin khan Mizo Hnam Run inkhawm neih a ni a, thusawitu MNF Adviser & Minister Lalruatkima chuan MNF chu hnam thuthlung kengtu a ni a, hnam himna a awm, a ti.

Lalruatkima chuan MNF sorkar thiltih tam tak leh hmachhawp te enin hmabak chhunzawm ngai tam tak a awm tih a sawi a. “Ram leh hnam himna kawngah pawh MNF hi sawrkar lo se engtinge kan nationalism hi a awm ang? Hnam thuthlung kengtu kan ni a, kan hnam himna hi MNF-ah hian a awm a ni,” a ti.

“Zofate rorelna pakhat hnuaia kan awm theihna turin Pu Laldenga hova hmalakna kha a la nung reng a. Hei hi kan hnam aiawhin ZORO-in an kalpui mek. Kan thenawm ramte en ila sakhaw dang hual vel kan ni a. Heng karah hian zofate kan him theihna turin zalenna sualtute chawi nunga tan kan lak a ngai,” a ti.

Congress sorkar laia tawrhna te sawiin, “Zu zawrh, kawng chhia, gas harsatna, lirthei chhiah tihsan, sikul tan hma avanga harsatna zawng zawngte kha kan theihnghilh zo ta em ni? MNF sawrkar chuan khang harsatnate kha kan sukiang a. Hripui harsatna karah sum leh paia manganna namen lo kan tawk chungin mawhphurhna la ngam hruaitu kan nei,” a ti.

Ramri buai chungchangah sawiin, “MNF hi sawrkar lo ta se, Assam lam chuan Vairengte chhak lam an rawn thut tawh mai thei. Assam nena ramri buainaah Pathian kan lama a tan tlat avangin hnehna kan chang,” tiin, “Union budget an pharh khan ni danga kan la hriat ngai loh Mizoram pual – bamboo link road Rs vbc 100 leh bypass road Rs vbc 500 tur dah tel a ni. Hruaitu tha kan nei tih i hre nawn leh ang u," a ti bawk.

“MNF Sawrkar hi kum hnih chhung kan khawngkhawbai a. Kan hmalakna chhunzawm turin kum nga dang kan sawrkar leh ang. Khawthlang leh chhim lam bial 10 en ila Pathianin MNF tan kawng a lo sialsa vek mai. Hei hi kan hmuh dan mai a ni lo, party dang MLA-te pawhin an hmuh dan a ni,” a ti a. Assam Rifles chungchangah: “An chhuak hreh hle a, chhuanlam an siam nasa hle. Kan sawrkar leh ngei ngei a ngai, party dang sawrkar se an nawr chhuak loving,” a ti.

Party dangte dinhmun chungchangah, “Candidate an han set a, an buai em em a. Tling zo lo tura an ngaihte an thlak a. Damlo an awm leh dawn em tiin kan thlir,” a ti a. “Congress pawh an party senior-hoten bhavan an tlawh duh lo, an hotupa ber a dictator lutuk an ti,” a ti a. MNF Sorkar thar hmachhawp sawiin, “Hna lak a harsat laiin hnaruak 600 chuang hnawhkhahna tur finance lamin min phalsak vek tawh a ni,” Lalruatkima chuan a ti bawk.