Aizawl November 7, 2022 : Mizo Hnam Run inkhawm-ah MNF Adviser & MoS Robert Romawia Royte chuan MNF chu party vul reng leh vul tulh tulh tur a nih thu leh MNF chanchinah tun hun hi historian-te pawhin 'Golden period' ti hiala an la ziah a rin thu a sawi.

Robert Romawia chuan, "MNF hi a tlo khawp mai a, a la vul tulh tulh dawn. Kan pian hma daih pawhin MLA pathum an lo nei daih tawh a, party upa leh party vul reng a ni," a ti. MNF zawm tura thutlukna a siam chu a tihsual loh thu sawiin, "Kum 2018 inthlanpui hnu lamah ZPM-in MLA pahnih an chan tawh a, MNF lamin pahnih kan neih belh. Inthlan hrang hrangah MNF dinhmun a tha hle a, heti chunga inthlanpui hmachhawn chu thil nghahhlelhawm tak a ni," tiin, MNF chanchinah tun hun hi historian-te pawhin 'Golden period' ti hiala an la ziah a rin thu a sawi.

MNF leh India inremna - Memorandum of settlement angin Article 371G - 43rd Constitutional Amendment-ah dah chungchang sawiin, "India Parliament-in dan siam mah se, Mizoram Legislative Assembly-in kan inhumhimna (safeguard) dan leh thuneihna bik kan neih hi khawi state mahin an nei ve lo. India sorkarin dan khirh tak tak siam mah se, keini anga safeguard nei an awm ve lo. Heng te hi Pu Laldenga te, Pu Zoramthanga-te thawh rah a ni," a ti.

Citizenship Amendment Act (CAA) kha a hlauhawm lo tih sawiin, "Mizoram LS MP-in CAA a vote kha NE State duh loh dana an tihdanglam vang a ni. CAA original kha kan duh lo, Council of Minister thukhawm (Mizoram Cabinet Meeting) ah pawh India rama duh lohna resolution pass hmasaber kan ni a, a awmchhun kan ni hial mai thei. Parliament-in Revised CAA an pass-ah khan hmarchhak tlang mite kan tel ve lo. Kha vang khan kan MP pawhin revised CAA kha a vote zawk a ni," a ti.

MNF Adviser Robert-a chuan Mizoram Congress president atan Pu Sawta an ruat chhan nia a rin sawiin, "Inthlan leh hunah Congress hi an la tling dawn chuang lova, anmahni tlakpui turin tuna an president hi an dah a ni," a ti a. ZPM chungchangah sawiin, "Party pakuaa zuang lawr tawh hi chief minister an la awm ngai lo. Eng mi nge a nih a, eng poilitical commitment nge a neih? Kum 2023 hnu lamah chuan an kiam tawh ngawt ang," tiin ZPM-ho chu zan khat thil thua awmna party sawn thei an tam hle, a ti bawk.

CM-in a duhsak bik nia an sawi thin chungchang sawifiahin, "Kan Chief Minister zahawm tak hian Minister leh MLA-te a duhsak dan a inang vek. Duhsak bik tia sawi thin hi - Robert-a hi eng deptt nge a pek? Finance deptt atangin pawisa engzat nge a pek? NABARD loan a pe em? NEC leh Doner Ministry hnuaia priority list-ah project engzat nge dahsak a nih? tih te hi in lo chhut dawn nia," a ti. "Covid-19 hnu lama PMJVK inti hria (party dang) an awmte hi ka awih lo. Deptt tinin project an siam thei vek. Sports atanga kan hui luh tam avangin CM duhsak bik tihna a ni lo," a ti bawk.

SEDP chungchang sawiin, "Mi hausa tan a tangkai lo mai thei. Mi rethei leh harsa zawk tan chuan direct benefit scheme tha tak a ni a. Dik takin kalpui ila, party danga mi harsate pawh i thlang zel ang u," a ti bawk.