Aizawl: BJP aiawha Mizoram enkawltu Assam Finance Minister Hemanta Biswa Sharma chuan BJP leh Mizoram Political Party lian 3- Congress, MNF leh ZPM te chu an thawk ho ngei tih nimin zing khan Hotel Regency-a chanchinbu mite a kawmnaah a sawi. Hemanta Biswa Sharma chuan Political Party lian pathum Congress, MNF leh ZPM ten BJP nena tangdun anga inpuhmawhna chanchinthar lama tihchhuah thin a nih chungchangah, heng party 3 te nen hian an thawkho ngei niin a sawi a.NEDA-ah MNF nen an thawkho a, CADC-ah Congress nen, ZPM nen hian hun hma lamah an lo thawkho tawh niin a sawi bawk. Hemanta Biswa Sharma chuan heng an thawhhonaah hian engmah puanhnuai thil a awm loh thu leh BJP chuan Post Poll-ah thawhho a ngai a nih pawhin langtlang taka thawhho an tum tih a sawi a. Political party dang te nena an thawh ho a ngai a nih pawhin BJP chuan chhan eng dang vang ni lovin Mizoram mipuite inlungrualna leh thattlanna tur a ni dawn niin a sawi.