Aizawl December 16, 2022 : Vawiin khan MNF Exodus Day 52-na chu Vanapa Hall-ah hman a ni a. He huna thusawitu MNF President Zoramthanga chuan MNF chu harsatna su tura Pathian din niin a sawi a, Assam CM-in inremna a bawhchhiat avangin sipai a rawn tir lui a, ram a buai phah ta niin a sawi bawk.

MNF President Zoramthanga chuan, "MNF hi Mizoram tan, harsatna su turin Pathianin a din a ni. December ni 16 hi India sipaite tan hnehna ni ropui, an hmelma Pakistan tlawmna ni 'Vijay Diwas' a nih rualin MNF sipaite tan pawh Pakistan sipaite lak atanga chhanchhuahna ni ropui 'Exodus Day' a ni, a ti a. "Harsatna su turin Pathianin MNF hi a tir atangin a din a, a suttlangtir thin," a ti.

Zoramthanga chuan, "MNF hi mautam tam harsatna avangin kum 1961 ah a lo piang a. Kum nga chhung chauhin a thang nasa em em a, kum 1966-a ram a buai meuh chuan kan tlangval tam zawkte ramhnuaiah an kal a ni," a ti. Rambuai kha Pathian ruat a nih thu sawiin, "Pu Laldenga khan buai lova politics kalpui a tum laiin, Assam CM-in inremna bawhchhiaiin sipai a rawn tir luia kan ram a buai ta a ni," a ti.

Kum thum chhung India nena indo hnuah tlanchhiat a ngaih thu leh harsatna tam tak karah India biak dan zawn a nih dan sawiin, "Mihring tumna leh remruatna zawng zawngte kha lo hlawhtling se, vawiina kan inremna ang hi a chhuak lo ang. Kan hlawhchhamnate kha Pathianin Zoram tundin a tumna zawk a ni," tiin, Pakistan president Ayub Khan remtihnain Pakistan-a an chhuk thu leh thing lu bula dan chepna atanga an chhuah zalenna (exodus) chu, "Pu Laldenga remruatna a ni lo, Pathian remruat a ni," a ti.

Zoramthanga chuan: "Party dang ang kan ni ve lo, Mizoram chhanchhuak tura Lalpan a siam a nih angin underground politics harsatna period-ah engzatin nge nunna chan? Overground politics-ah pawh president's rule atangin harsatna tam tak paltlang a ni a. Kum 10 opposition-a kan awm chhung khan kan inchan nasa hle a, Congress vanglai a ni a, an duh tawkin min beng pherh a ni," a ti.

"Pathian hun ruatah meuh chuan kum 2018 inthlanah two-third majority neiin kan chak a. Khatianga chakna kan kan beisei phak loh a ni - Covid a leng dawn, harsatna tin reng a thleng dawn tih hi kan Pathianin a hre vek a. Heng hun atan hian MNF hi a dah a. Tunah pawh beih tin rengin min bei! Nimahsela, Pathianin min tung ding ang, election fight tlang na khawp chakna min pe ang," tiin keini ho hi kan thu lo em a, remruattu thu a nih zawk thu MNF President chuan a sawi a ni.

Inkhawm hruaitu MNF Sr. Vice President & Dy CM Tawnluia kaihhruaiin martarte sunna hun hman a ni a. MNF President & Chief Minister Zoramthanga chuan Parva daia ralthuam dahna memorial atana siam lungphun a hawng a. MNF Treasurer K. Vanlalauva'n underground Signatory leh MP-te inhmelhriattirna neiin, anni hi thilpek hlan an ni bawk. MNF Exodus Day lawmnaah hian Maj. J Thanruma'n hunserh a hmang a. MNF Adviser R. Tlanghmingthanga (ex minister) hnen atangin MNF Volunteer - first contingent chungchang ngaihthlak a ni bawk.