Aizawl April 10, 2024 : Vawiin hian Mizo National Front Elected OB, National Core Committee, PAC, Advisers, General Secretaries leh Secretaries te chu Mizo Hnam Runah MP(LS) Inthlan Campaign kal mek te ngun taka thlir ho a ni a, hmalak chhunzawm zel dan turte ngaihtuahho a ni bawk.

Kalkhawmte hnenah thuchah tawi sawiin MNF President Zoramthanga chuan, "Politics ah hian a lawmawm zawnga thil thlir thiam a tul a, chu chu mipui pawhin an lawm zawk fo, Zoram mipui Candidate atan Pu K.Vena kan nei hi kan vanneih pui ngei a beiseiawm a. Nomination Committee in ngun taka ngaihtuah chunga an thur chhuah a ni a, mipui rilrem tak MP ni mek, huaisen leh ram leh hnam tana inpe tak a nihna te min hriatpui avangin mite ngaihzawn a hlawh em em a ni. ZPM candidate chu belebut taka an hotu thenkhat hriat kim lemloh leh an hruaitute zinga itawm tak tak an neih thlimna kara an vawrhchhuah a ni. Hei hian mipui mar deh kawngah ngaihtuahna thui tak seng leh senglo hmel a lo tilang ta a ni," a ti.

MNF President chuan,"Mimal a chhe zawnga insawisak vak vak hi thil hrisello leh a hnam ang pawha kan hmel tibaltu a nih theih avangin, keini chuan ching ve lo ila, hetiang uar thin pawlte ze chhe tak hi i ching ve hauh lo ang u. Mipui Candidate Pu K.Vena dinhmun in san lam a pan zel avangin beihna chi tinrengin an bei chho zel a. A inhnamhnawih reng reng lohna Kolkata-a Mizoram House hmun nuam zawk leh zau zawk, lian zawk leh dawnghlawk, remchang zawka sak tum avanga a hlui tihral chungchang te nasa takin an vawrh vel mek a ni. Hralh tum hun laia engmah sawi duh lovin mipui rilru vawiinah hruaikawi an tum mek a ni," a ti bawk.

Kalkhawmte hian Zoram Mipui Candidate hova Zoram dung leh vang fang kuala Campaign rusum thlakna ah beiseina an nei sangin, lawmawm an ti hle a, zoram mipui Candidate a nih anga mipuiten lawm tak leh phur taka an lo dawngsawng thin chu Pathian hnathawh ah an ngai a ni. Candidate chhuanawm tak leh huaisen, ram leh hnam tana tlanchhe ngailo thehchhuah a ni chu beiseina sang tak neih tirtu a nih thu sawi a ni bawk. Chutihrualin hmabak thui tak a la awm a, Pathian leh mipui zara hnehna chan ngeina theihtawp chhuah zui zel tul an tih thu leh phur taka beih zel an tum thu an sawi hlawm a ni.