Aizawl November 15, 2022 : Congress Thalai - Mizoram Pradesh Youth Congress Committee (MPYCC) chuan vawiin khan Congress Bhavan-ah Executive Meeting an nei a, anmahni bialtu Indian Youth Congress, New Delhi Secretary Sofiqul Wazid chuan hmanpuiin, MNF ten an thawhpui danah Central BJP an lawm a rin loh thu a sawi.

Indian Youth Congress (IYC) Secretary Wazid-a chuan, "Mizorama sawrkarna chang mektu MNF te chuan anmahni hamthatna turah chuan Central BJP lakah hian thiam takin anmahni thlawptu niin an in sawi thin a, an mamawh loh chinah erawh BJP te hi engah mah ngai lovin an thlauh thla leh thin a. Mizorama BJP MLA awm chhun pawh opposition lamah an thut tir reng hian chu chu a tichiang a ni," a ti.

Mizoram Congress chungchang sawiin Wazid chuan, "Congress Party-in ram siam tak tak tumna manifesto a nei hi lawmawm ka ti hle a, tang puihna tih hi UPA sawrkar khan a thil ngaih pawimawh em em a ni a. Policy hrang hrang pawh duangin nasa takin hma a la tawh thin a. Pu Lalsawta kaihhruai Congress party hian sawrkarna a chan chuan heng hi a tihhlawhtlin ngei ka ring tlat a ni," a ti. 

IYC Secretary chuan kum 2024 India ram inthlanpuiah Congress kaihhruai UPA sawrkar a din leh ngei hi a rinawm tawh a, tuna BJP sawrkar chu sakhaw zalenna rap bettu an nih avangin rei an daih tawh dawn lova. UPA sawrkar chu India ram mipuiten koh kir leh ngei an tum niin a lang chiang tawh a. A bik takin Kristian sakhua vuantute tan phei chuan BJP sawrkarna hi a tha lo em em a ni, a ti.