Aizawl April 17, 2024: Mizoramin Lok Sabha MP seat pakhat a neih luahtu tur thlanna April ni 19-a neih turah Campaign beipui thlak chhoh mek anih laiin, kum 2016 Season-a Mizorama Grape chingtute hloh rulhsakna tur tanpuina, Market Intervention Scheme (MIS) hnuaia Rs. 3,70,35,141 (cheng vaibelchhe thum nuai sawmsarih sing thum sangnga za sawmli pakhat) Central sawrkarin a ruahman, kum 2018-a pek chhuah chu tih chingpen a nih thu Social Media lama lo lang chu chhui chianga, a mawhphurtu chunga Dan anga hmalak anih theih nan MNF party aiawhin Albert VL Lawma'n vawiin khan CBI leh ACB ah te FIR an thehlut.

Mipui sum cheng vaibelchhe 3.70 chuang, Grape chingtu loneitute tana Central sawrkarin a pek chhuah atang hian 35% chu ZPM MP Candidate Richard Vanlalhmangaiha'n a la niin Social Media lamah nasa takin a darh a, he tapuina sum hi Mizoram-a Grape chingtute tan Central sawrkar, Ministry of Agriculture & Farmers Welfare, Dept. of Agriculture, Cooperation & Farmers Welfare chuan MIS hnuaiah kum 2016 season atan a rawn pe a, he sum hi Hnahlan Grape Growers Society te account-a a luh hnuah, Richard Vanlalhmangaiha chuan 35% a la peng nia sawi a ni a, sum sanction zat atangin 35% hi cheng vaibelchhe 1 leh nuai 29 chuang a tling a ni.

Loneitute tanpuina tura Central sawrkar atanga tanpuina lo kal, lo pawh hek saka puhna chungchangah hian Pu Richard Vanlalhmangaiha hian vawiin thlengin insawifiahna emaw, a dawn loh thu emaw sawi chhuahna a la nei lo tih MNF Party chuan an FIR ah hian an tarlang a. Hemi kaihhnawihah hian Hnahlan Grape Growing & Processing Cooperative Society chuan 28.3.2024-ah Chairman leh Secretary hminga thuchhuah siamin Richard Vanlalhmangaiha chunga an lawm thu leh a kuta pawisa lut chu society member te remtihna a nih thu an tarlang bawk a, hetihlai hian MIS kaihhruaina (Guideline) Central sawrkarin a tih chhuahah mimal kuta 35% a luh theih dan tur engmah a awm loh avangin, Grape chingtute hian zaa 35 hi Richard Vanlalhmangaiha kuta a luh an lo remti anih pawhin thil dik lo a ni a, Richard Vanlalhmangaiha hian 35% hi a lo la ngei anih chuan mipui sum tih chingpenna lian tak, Dan hnuaia hrem ngei tur a ni tih MNF Party hian an sawi a. MNF Party aiawha FIR thehluttu Albert V.L Lawma hian Loneitute tanpuina tur sum tam tak eirukna ni ngeia lang chu chhui chiang tur leh, Dan anga Richard Vanlalhmangaiha chunga hmala turin CBI leh ACB te chu a ngen a ni.