ZALEN November 13, 2024 : MNF chuan tan bik nei lova Manipura remna leh muanna a awm theihna tura hnathawk tur CRPF ten Mizo Volunteer, mahni khaw venga duty 10 lai an kaphlum chu pawi a ti tak zet a. Mizo pasaltha hnam chhana nunna chan ta te an sun tak meuh a, an kal san tak an chhungkua te Pathianin awmpui mawlh se an ti.

MNF chuan "Dam leh tlang khatah, thih leh ruam khatah' tih thu hian Mizo hnam rilru a luah reng angin, kan Pasalthate thihna hi a ngai urhsun takzet a, thinrim thlak a, Central Police Force te chet dan hi a demawm a, thliar bik neia Zo hnam chunga an khawsak dan hian kan hnam thinlung a vit thuk hle a ni. Remna leh muanna kawng lam aia buaina tizual tur zawnga an chetna hian India ram tan rah thalo tak a hrin a hlau hle a ni," an ti.

Vawiin hian Hnam Pasaltha 10-te ruang hi Silchar atangin Lamkaah Mizoram paltlangin lakchhoh a ni dawn a. Hmun hrang hranga ruang lo hmuahna turah a tam thei ang ber MNF-te thawkchhuak turin an inngen a. An phu ang ngeia zahna leh chawimawina lo hlan turin an inngen a ni. CYMA-in Mizo Hnam aiawha hmuahna hmun Thuampui, Aizawl-a a buatsaih tur hi lawmawm a tiin, an thlawp tlat a. He hunah hian MNF General Headquarters pawhin zahna alo hlan dawn a ni.

He Mizo hnam a awm chhung chuan heng martar-te hming hi hriatreng a ni tawh ang a. An hniak hnung zui a, ram leh hnam tana inhlan thar theuh turin Zofa zawng zawngte MNF chuan a sawm a ni.