ZALEN September 14, 2026 : Mizo Hnam Runah chhung inkhawm chu vawiin khan neih a ni a. Political session a thusawitu MNF President Zoramthanga chuan MNF Constitution-in thuneihna a pek angin MNF party chak zawk leh tluang zawka a kal zel theih nan Working President-ah Tawnluia, Ex- Dy. Chief Minister; Vice President-ah Lalchamliana, Ex-Home Minister leh D.Thangliana Ex-MLA, Khatla-te chu a ruat tih a puang.

Zoramthanga chuan, "ZPM chuan an party General Headquarters inthlan an huphurh hle tih sawiin, inthlanna neih an tum lo a, Vice President pawh engemaw zat an ruat belh tawh a, Congress pawh an inthlang dawn lo, Vice President pawh an inruat belh zel a. Keini pawh hi nakkum kan party inthlan hun a ni a, inthlang ta i la, Elected OB thar, NCC, PAC, Adviser, GS, Secretary leh frontal zawng zawng a vaia inruat thar a ngai dawn a. Promotion beisei nei mi tam tak kan tikhaih lak thei bawk a. Term dangah pawh kan lo tih thin fo tawh angin, party inthlan chu MLA election dawn a ruaiah kan nei ngai lo a, MLA inthlan zawh hunah kan nei zawk dawn a ni. Party dang pawhin an ti vek a, keini pawh kan Constitution-in President thuneihna a pek angin hetiang hian kan party chak leh zuala a kal theih nan kan inruat thar a ni," a ti.

MNF President chuan kum 1986 June ni 30-a inremna neih chhuanawm zia sawiin, Mizoram mipui tan chhinchhiahtlak leh pawimawh ber a ni a, India ram hruaitute leh khawvel ram dang hruaitute pawhin ropui an tiin an ngaih hlutsak a. Inremna kha min beituten tun hma pawhin sawinep sak min tum thin a, mipuiin an awih duh lo a, an sim hman viau a. Mahse, tun hnaiah Pu Duhoma hian MNF tih chhiat theihna kawng awm chhun nia a hriat vangin a rawn phawrh leh a ni. 'MNF leh Home Ministry sign' a ti a. India sawrkar leh mipui aiawhin Union Home Secretary RD. Pradhan chuan a sign a, Mizoram sawrkar, mipui aiawhin Chief Secretary Pu Lalkhama'n a sign a. MNF aiawhin Pu Denga'n a sign a, hmuh theihin document dik tak a la awm vek a. Pu Duhoma hian dawt a zawnga dawt lian ber a sawi a. Khatiang a sawi avang khan beitu a ngah tan viau a, a zuzi nan thil chi hrang hrangin a sawi kual hnan leh a ni, a ti.

Zoramthanga chuan 2006 khan Chief Minister anih laiin Prime Minister Manmohan Singh leh Union Home Minister Shivraj Patil chu Aizawl-ah remna lawmna a lo tel tura a sawm thu a sawi a. Anni chuan official takin lehkha ziaka an rawn chhanlet thu a sawi a. Mizoram history a chuang tlak inremna document puitling a ni a, Mizo mipuiten hnam an hmangaihzia an lantir a. India ram hruaitu ropui Prime Minister Rajiv Gandhi tih te, Mizo hruaitu ropui Pu Laldenga tih hmingte pawh an ziak tel a ni, a ti. 

Peace Accord hlawhtling ber leh chhinchhiah tlak a ni a, development pawhin nasa takin a tanpui dawn che u a ni tihte pawh an ziak a, document an la kawl vek a. Pu Duhoma hian 'Inremna tlar tinah ka tel ve a ni' a tih kha, a tel lohna zawng zawngah pawh lan ropui duhin tel angin a insawi vek a, kha tih lai khan Pu Duhoma hi sawi rik a ni ve lo hrim hrim a ti bawk.

MNF General Headquaters hruaite:

President : Zoramthanga

Working President : Tawnluia

Sr. Vice President : Dr. R. Lalthangliana

Vice President : Vanlalzawma, Lalchhandama Ralte, Lalchamliana & D. Thangliana

Treasurer : Lalruatkima