Aizawl; MNF party chuan Chief Minister Lal Thanhawla chu tawngkam tlahawlh an tih thu sawiin, insum turin an chah. Nimina MNF party thuchhuah chuan, Chief Minister chu March ni 14, 2014-a a thusawiah  'Hrangturzo bial MLA Bye-Election lo awm tura an candidate a puannaah, he bial mipui te'n ruling party an vote tling duh lo a nih chuan, Congress Ministry-in an mamawh châkkhai dîl dawn pawh ni se, tukkhum chhan an lo chhawn a nih pawhin an vui thei lo ang,' tia ngaihthlak theiha vauna aw-kâ chhâkchhuakah an puh a ni. Chief Minister tawngkam chhuak chu MNF chuan pawî an tih thu leh an hriatthiam loh thu sawiin, "CM Lal Thanhawla hian a mah thlangtlingtute a zah lovin, a hmusit hle niin kan hria," an ti a. "Mizo mipui mimir leh, kohhran bakah a sorkar venpuitu tura an din, Ethics Committee-te mitmei pawh a veng duh eih lo mai hi MNF chuan thlir liam mai mai har a ti a. Ram khat hotupa ber tawngkam chhuaka mawilo a chhak chhuak zing lutuk leh, indeuhsawhna, runluihna nia ngaihtheiha kohhran hnarkaitute thleng pawha a vai hma mai hi, MNF chuan demawm kan ti ta hle," an ti. Tun dinhmuna Mizoram sum harsatzia leh Aizawl Norh leh South Treasury khar loh chauhva a kal dawr dawr dante, Bill pass hleih theih a ni ta lo te chu Chief Minister Lal Thanhawla sorkar, financial management-a a fail chianzia tilangtu-ah an ngai tih sawiin, "MNF party chuan CM Pu Lal Thanhawla sorkar hi mipuiin kan venpui a ngai takzetin kan hria a. Chhanchhuah tlak la awm Zoram chhanchhuak turin kan hmalawka MP (LS) leh Hrangturzo bial MLA Bye-election lo awm turah United Democratic Front (UDF) candidate te lo vote ngei turin Mizo mipuite kan sawm tak meuh meuh a ni," an ti.