Aizawl April 17, 2024 : ZPM chuan Kum 2024 MP (Lok Sabha) inthlan lo awm tura MNF Party official candidate K. Vanlalvena, Rajya Sabha MP ni lai mek hnenah kum 2022, MNF Ministry hun lai khan In hmun, LSC pek a ni a. He in hmun, LSC No. CAD 178 of 2022, square meter 229.39, Luangmual High School Veng, Aizawl-a mi hi Luangmual Industry Department ram a nih thu RTI chhannaah tarlan a ni, an ti.

Hemi chungchangah hian Land, Revenue & Settlement Department, Govt. of Mizoram hnenah RTI hmanga zawhna siam a ni a. He RTI zawhna hi, April ni 15, 2024-a Revenue Department-in a chhannaah chuan K. Vanlalvena hnena LSC No. CAD 178 of 2022 pek chu House Pass No. 153 of 2021 atanga siam a ni a, he In hmun, LSC hi Industry Department Land Lease No. 01/1023/13/03/19 of 2015 chhunga mi a ni tih Land, Revenue & Settlement Department chuan an tarlang a ni.

K. Vanlalvena hian kum 2023 MLA inthlan leh kum 2024 MP (Lok Sabha) Election Affidavit-ah he Luangmual High School venga a in hmun neih thar LSC No. CAD 178 of 2022 hi a lo tarlang tawh a, Pass No. en hian, Rajya Sabha MP a nih laia pek a ni tihna a ni, an ti.

K. Vanlalvena hnena in hmun pekna RTI chhanna atanga a lan danin Luangmual Local Council leh YMA ten NOC sign an hreh thu ‘Note Sheet for Technical Check’- ah tarlan a ni a. K.Vanlalvena in hmun dilna ram hi G&M Luangmual House Site Plan Phase-I area chhunga Industry Department ram anga record a nih thu tarlan a ni bawk.

ZPM chuan K. Vanlalvena ram dil thenawmah hian YMA leh Presbyterian Kohhran ten ram an neih thu tarlan a ni bawk a; amaherawhchu, ‘No Objection Certificate’ an sign-na hmuh tur a awm lo a, Land Lease neitu Industry Department pawhin ‘No Objection Certificate’ an pe chhuak lo bawk a ni. Chu mai bakah, K. Vanlalvena hnena ram pek hun kum 2021 leh 2022 hian Luangmual rama Industry Department ram, Land Lease (No. 01/1023/13/03/19 of 2015) hi cancel a ni lova, a area hi tihdanglam a nih thu sawrkar thuchhuakah hmuh tur a awm lo bawk a, hei vang hian K. Vanlalvena hnena ram pek hi Mizoram (Land Revenue) Act, 2013 dan kalh, dik lo taka pek ngei tihna a ni, an ti. K. Vanlalvena hian a hmangaih Zoram hnenah hian Dan lo anga a ram neih hi a hlan let leh ngei ZPM chuan an beisei bawk a ni.

ZPM chuan naktip, April ni 19, 2024 (Zirtawpni)-a MP (Lok Sabha) thlan turah ZPM Official Candidate Richard Vanlalhmangaiha vote sak theuh turin Zoram mipuite thinlung leh tih takzetin an sawm.