Aizawl April 4, 2024 : Vawiin khan K.Vanlalvena, MP(LS) Candidate chu Pachhunga University College Students Union hruaitute nen inkawmin, Pachhunga University College-a Students Union hruaitu a lo nih tawh dan te leh MP (RS) a nih chhunga ram leh hnam tana a thawhte sawiin 2024 MP(LS) atana thlan tlin anih chuan State Sawrkar nen ram hnuk khawihah chuan hruikhat vuana an thawhdun theih tur thu a sawi.

K.Vanlalvena chuan, "MZP hruaitu kan nih laia Mizorama hnamdang sumdawngte zalen taka an inbun tur theihtawpa kan lo dodal thin khan vawiinah hian sumdawnnaa kan hnam chimrala kan awmlohna turin rah a lo chhuah reng a. Hnam thil avanga tan in bang ka lo zut thin te kha a hlawkna ka hmu a ni," a ti a.

Zirlai hruaitute zawhna chhangin, "India sawrkar hian kan unau Myanmar atanga rawn ral tlan te hi refugee-ah a la pawm lo a. Unau kan nih tlat avangin MNF Sawrkar kalta khan India Sawrkar thu leh hla dodal in kan unau rawn tlante chu hmangaih takin a lo enkawl a. An tana thlamuanna nih ve zel hi ka tum a. India Sawrkarin a remtilo chung Parliament-ah pawh ka auchhuahpui a ni," a ti bawk.

NDA-a BJP nena thawhho chungchangah K.Vena chuan, "NDA thawhpui chung khan kan hnam leh sakhaw chungchangah chuan BJP thil tum dodaltu awmchhun ka ni a. MP(LS) atan hian mipui khawngaihna avanga thlantlin ka nih chuan he ram leh hnam tan hian ka dinna a la pangngai reng a, kan sakhua leh hnam pawi sawina tur chi chu ka do zel ang," a ti bawk.