Aizawl March 14, 2024 : Vawiin khan Mizo National Front, National Executive Meeting chu Aizawl Vanapa Hall-ah neih a ni a. He hun hi President Zoramthanga chuan a kaihruai a, resolution panga an pass.

He hunah hian MNF term hluia executive member-te term chu June ni 1, 2024 thleng pawh sei nise, tih rel a ni a. Mizoram Politics lumlet dan hrang hrang te thlir niin Lok Sabha inthlan tur boruak thlirna neih a ni bawk a ni.

National Executive Committee Meeting chuan a hnuai ami ang hian Resolution a pass bawk.

1. MNF President Pu Zoramthanga kaihhruaina hi kan ring tawk a, a thawhpui Office Bearer thlan tharte nen lungrual taka min kaihhruaina hnuaiah chak takin kan kal zel dawn a, Kan ram, kan Hnam leh Sakhua a him zel theihna turin, Pathian leh kan Ram tan ti chung zelin huaisen takin kan kal zel dawn a ni.

2. MNF MLA thlan tlin thar te kan chhuangin, Assembly Budget session neih zawk tak ah an mawhphurhna an hlen tha hle mai a, Sawrkar khalhngil hna leh thudik tundin kawngah an hnathawh te fakawm kan ti takzet a ni. Tin, kan MP pahnih(Lok Sabha & Rajya Sabha) ten Mizoram leh hnam aiawha an tihtur huaisen tak leh thahnemngai taka an thawk thin hi a thlamuanthlak kan tiin, kan chhuang takzet bawk a ni.

3. Central Sawrkarin Myanmar nena kan inrina a zalen taka kan inkal pawh theihna hmun phalchin a neih thin Free Movement Regime a rawn titawp hi a pawi kan tiin, kan dodal tlat a. A thutlukna hi sut leh thuai turin kan phut tlat a ni.

4. Myanmar nena kan inrina Central Sawrkar in hung tuma hma ala mek hi kan do dal tlat a, hemi kawnga ZPM Sawrkar chetdan chu a duhkhawp lovin, BJP nena an puanhnuai thil lo lanchhuahna ah kan ngai tlat a ni.

5. An chenna ram buai avanga kan unau Mizoram rawn bel - Myanmar, Bangladesh leh Manipur atanga rawn tlanlutte harsatna tawh mek hi kan hre reng a, hun ralmuang an neih let leh ngei kan beisei pui a, chutihrualin an Inpui lo thleng anni tih inhria a, thlamuang taka awm turin duhsakna kan hlan a ni.