Aizawl March 28, 2024 : April ni 19-a Lok Sabha MP thlanna tura MNF Official Candidate K Vanlalvena chuan ram, hnam leh sakhua-in nekna nasa tak a tawh mek karah Zoram mipuite leh zofate tana huai taka ding tlat turin, mipui candidate ni tura pen chhuak a ni tih a sawi.

Serchhip Bazar-a Street Campaign a neihah K Vena hian NDA chu Congess leh an thurualpui party te intelkhawmna UPA paihthla tura din anih thu leh MNF pawh NDA dintu founding member zingah a tel thu a sawi a, NDA chhunga BJP hmalakna avangin Kristianna a chep tih chu amah pawh ataka hretu anih thu a sawi a, India ramah Hindu Nationalism a lian zel a, chu chu BJP in politics khelh nan an hmang a, hei hi NDA chhunga awm Christian MP ten na taka an dodal zel a tul tiin, "BJP chak chho zelah a hlanga sawrkar siam theihna khawp MP an neih leh ngei hmel a, Hindu kulmuk hlangin ro an rel lohna turin Kristian MP te chu kan tel ve rih tlat a ngai a ni a ti. Tribal te dikna leh chanvo humhalh zel turin, NDA ah kan thu lui zel dawn zawk a ni," a ti.

K Vanlalvena hian Rajya Sabhaah NDA thutna atangin Mizoram, Mizo Hnam leh Sakhua himna turin theihtawpin a lo au tawh thin tih sawiin, Manipur-a Kristian biak in 300 chuang hal a nih khan tum hnih parliament ah a au chhuak tih a sawi a, Congress MP rual sakhaw zalenna duhtu intite zingah Biak In hal anih demna thu sawi chhuak ve tumah an awm lo a, Myanmar atang raltlante thawn kir tura Central sorkarin thupek a chhuah dodala, kan unaute an ni a, kan thawn kir dawn lo tia au chhuak pawh amah chiah a ni leh tih a sawi a, Sakhaw zalenna tia NDA lama a thu bei thintute zingah Manipur-a Biak In hal chungchang leh Myanmar atanga Kristian raltlante chungchang auchhuahpui chu amah chiah a ni tih a sawi.

K Vanlalvena hian mipui candidate tura inpe anih avangin Lok Sabha MP ah thlantlin anih chuan Mizoram hmasawnna turin State sawrkar thuneitute nen pawh theihtawp chhuaha thawh ho a tum thu a sawi a, Rajya Sabha-a chhuahsan chuan ZPM in Rajya Sabha MP an neih nghal dawn tho avangin, Mizoram, Mizo Hnam leh Mizo sakhua humhim tura a hmalakna zau zawka a chhunzawm theih nan amah vote turin mipuite a ngen a ni. 

Serchhip Bazar-a Street Campaign-ah hian MNF Sr Vice President Dr R. Lalthangliana, Minister hlui pawhin thu sawiin, K Vanlalvena chu Mizoramin a la mamawh nia a hriat thu a sawi a, Party hranga awm mekte pawh ram leh hnam himna tura huai taka ding zel tur K Vanlalvena chu vote theuh turin a sawm a ni.

K Vanlalvena hian Serchhip-a chanchinbumite a kawm hnuah Thenzawl leh Sialsuk ah te Campaign beihpui a thlak chhunzawm leh a ni.