ZALEN December 11, 2023 : Vawiin hian Mizo Hnam Run chhung inkhawm neih a ni a. Hun hnihnaah MNF President Zoramthanga chuan thu sawiin, "MNF hi kum tharah kan insiam tha vek dawn, a siam that ngai zawng zawng kan siam tha ang. Rawtna zawng zawng pawh kan ngaithla vek ang," a ti. ZPM sawrkar chu Pathian ruatah pawm thiam turin party mi te a hrilh bawk.

A sawi zelnaah 'Mizoram Legislative Assembly inthlanna chu Pathian zarah tluang takin kan nei zo ta a, Zoram hmun hrang hrang a Party worker te, leh mipuite min support-naah lawmthu kan sawi a. MNF Party atangin MLA 10 lai Pathianin min pe hi a lawmawm hle a, hlawhtling lo zawkah tang mah ila, tun inthlan result hi kan thatna tur zawka Pathian remruat a ni tih kan pawm a ni' a ti.

MNF President chuan Zoram hmun hrang hrang a Party worker-te hi zam mai lo tur leh rilru thar nen tan lak theuh a pawimawh thu sawiin, "Chak zawkin hei aia tha hian kan kal ang a, kan tho kang leh ngei dawn a ni. Kan sawrkar loh avangin kan zavaiin kan na tih ka hria a, theitawp kan chhuah veknaah erawh lawmthu ka sawi a ni. Pathian remruat hi dan zawh rual a ni lo a, ZPM sawrkar turin Pathian in rem a ruat a ni tih pawm thiam ila, Pathian in zoram hi han enchhin ve reng reng a duh a ni," a ti.

Zoramthanga chuan, "MNF party ten kan sawrkar chhung in Zoram a that theih nan development tam tak kan khawih a, Kan tlin lohna lian takah hian Development that loh vang leh MLA candidate neih that leh that loh a ni lo va Pathian in kan tana rem a ruat a ni tih kan pawm thlap a ni. Amaherawhchu MNF party hi Party dang ang a ni lo a, Hnam thuthlung vuan tlattu leh Nationalism keng kawhtu, Pathian leh kan ram tan a din kan nih angin Pathianin MNF party a sawrkar leh theih nan kawng min sial sak leh ngei dawn a, kan tho kang leh ngei dawn a ni," a ti bawk.

MNF Legislature Party Leader Lalchhandama Ralte, Tuivawl bialtu MLA pawhin thu sawiin, “Inthlanna felfai leh thianghlim tak hnuaiah MLA inthlan kan nei thei a, ka thawhpui hlawhtlinna chang zo ve lo erawh ka tuar pui hle a ni. Pathian zarah kan dam ang a, kan tho kang leh ngei dawn a ni, a ti. Kan ram hi Rorelna pakhat hnuaiah MNF hi kan ding chhuak leh ngei dawn a ni," a ti. 9th Mizoram Legislative Assambly a Zoram kal leh zel kan relna turah hian, Zoram mipuite leh an hotute support-na an mamawh em em dawn a, theihtawpa thurawn pek a mamawh thu a sawi bawk.