Aizawl February 3, 2023: Friday Political Session, Congress Bhavan Golden Hall-a neihah MPCC President Lalsawta chuan central-a sawrkar lo mah se, Mizoram-ah an sawrkar theih thu leh sum seng tlem chunga sawrkar theih a ni tih an hriat thu bakah MNF sawrkarna hnuaiah Krismas hman a ni tawh dawn lo niin a sawi bawk.

Lalsawta chuan Party mipuite fuihin, "Central-ah Congress sawrkar lo mah se, Mizoramah kan sawrkar thei. Central-a kan sawrkar loh laiin Rajasthan leh Himachal Pradesh-ah te kan sawrkar tho. Arvind Kejriwal pawh Central-a sawrkar miah lovin Delhi UT-ah a sawrkar thei a, Mizo Union te, PC te, MNF-te pawh Central a sawrkar miah lovin rei tak Mizoramah an sawrkar thei. Central-ah ZPM sawi tur pakhat mah an awm lo, mahse Mizoramah sawrkar an tum ve tho. Chuvangin, Central a kan sawrkar loh avanga Mizoram kan sawrkar theih lohna chhan tur pakhatmah a awm lo," a ti.

MPCC President chuan, "Sawrkar loh lai hi sawrkar huna kan zia tur lantir hun a ni. Party thenkhat chuan anmahni thunun tura an dinte thu an awih duh lo a, "kan sawrkar huna kan tih tur alawm kan sawi" tiin sawi mam an tum. Mahse, sawrkar hma pawha thunun theih loh te hi sawrkar hnuah tuman an thunun lo ang. Kan sawrkar huna kan awm dan tur ang tak hian tun hunah hian kan awm tur a ni," a ti.

"Sum hmachhuana MLA election hmachhawn tum an awm laiin, Congress Party hian sum seng tlem chunga sawrkar hi a theih a ni tih kan hria a, Pathian rinchhanin kan inbuatsaih a ni. Chuvangin, Mizoram hmun tina Congress Party hotute pawhin inthlan kaihhnawiha sum kan sen tam loh nan vawiin atangin i thawk tan ang u. Candidate-te phurrit siamsak lo zawngin Campaign i bei ang u. Mi thenkhatten an sum ngah ringa tlin an tum hi mipuiin kan hnawl chhan a ni zawk dawn. Hawh u, sum hmachhuana politics khelte hi che thei miah lovin i siam ang u. MNF sawrkarna hnuaiah hian Krismas kan hmang tawh dawn lo. Hmalam i thlir tawh zawk ang u," a ti.

MPCC Gen. Secretary PC Lalthanliana chuan MNF inrintawk lohzia sawiin, "Mipuiin an rin tawh loh chu thu hran, anmahni leh anmahni pawh an inring zo tawh lo a. Party mala sawrkarna siam an awm ring si lovin, Coalition Government a awm a nih chuan Congress Party tel tur thu an sawi nasa a ni," a ti. ZPM pawh hian Party mala sawrkarna an siam loh tûr thu sawiin, "Pu Lalduhoma, an CM Candidate ber pawh hian bial hniha a din loh chuan a ngaih a ngam a rin loh thu leh Serchhip bialah chuan a tlin zawh a rinawm tawh lo a ni," a ti bawk.