ZALEN, October 08, 2025: Tun laia model lar ber ber pahnih, Zuali Chhangte leh Timothy Vangchhia te channa, ‘LASI EM NI?’ chu Zirtawpni zan hian Vana Pa Hall, Aizawlah tlangzarh a ni dawn.

‘LASI EM NI?’ hi kutchhuak hriat hlawh tak tak nei tawh, Bs Pictures kut chhuak a ni a, a ziaktu hi a changtupa, Timothy ziah a ni a, director a ni nghal bawk a. Ani hi lemchana sulhnu tam tak nei tawh, Mizo mipa model hriat hlawh ber zinga mi a ni.

A thawnthu hi tlangval pakhatin ramhnuaia hmeichhe danglam tak a tawn dan leh a hmeichhia tawnin a nun a khawih danglam dan a ni.

A changtunu, Zuali hi Femina Miss India 2023-a Mizoram aiawha lo inlan tawh leh lemchan lama sulhnu nei tha tak a ni a, tun hnai lawkah pawh H.O.M nena an channa, ‘Hretu der’ chu tihchhuah a ni nghe nghe.

‘LASI EM NI?’ hi tlangzarh zan atangin Runmawi app-ah lei theiha nghal a ni dawn a. A hmunah ticket lei theih a ni ang a, online-a hauh theihna kalpui mek bawk niin a leite tan vanneihna siam a ni ang.