ZALEN September 14, 2025: Prime Minister Narendra Modi chuan Inrinni khan lehlangin Mizoram a tlawh a, Rs. vaibelchhe 8,071 senga siam Bairabi - Sairang rel kawng thar, km 51.38-a thui a hawng a, Mizorama rel service thar pathum - Aizawl - Delhi Rajdhani Express (Anand Vihar Terminal), Aizawl - Kolkata Express leh Aizawl - Guwahati Express te a vai liam bawk.

Heng bakah hian Rs. 33 crore senga sak Residential School, Kawrthah (Ministry of Minority Affairs) leh Rs. 24 crore senga sak Tlangnuam Eklavya Model Residential School (Ministry of Tribal Affairs) chu a hawng bawk a. Rs. 500 crore senna tur Aizawl Western Side Bypass Road (MDoNER), Rs. 226 crore senga thawh tur Mualkhanga 30 Tounsand Metric Tons Per Annum Gas Bottling Plant (MoP&NG), Rs. 70 crore senga thawh tur Chhimtuipui (Tuipui Ferry) lei (Bridge) (MoRTH), Rs. 45 crore senga thawh tur Thenzawl - Sialsuk kawngpui (via Sathlur & Lau river) (MDoNER), Rs. 32 crore senga laih tur Khankawn to Rongura Hmun kawngpui, Serchhip district (MDoNER) leh Rs. 12 crore senga thawh tur Khelo Multipurpose Hall, Tuikual, Aizawl (Ministry of Youth Affairs & Sports) te lungphum a phum bawk.

Prime Minister chuan Pathianin Mizoram mawi taka a din chu lawmthu a sawi a, khaw chhiat vanga Aizawl a thleng thei lo pawi a tih sawiin ngaihdam a dil a, a awmhmun atangin Mizoram mipuite lawmna boruak chu a tawmpui tih a sawi.

“Mizoram mipuiten zalenna sual a ni emaw, India ram a lo din theihna atan hian theihtawpin hma hruaitu an ni thin a ni,” a ti a. Lalnu Ropuiliani leh Pasaltha Khuangchera te hming lamin, “An chet dan kha ram pumin an hlut a, an huaisenna leh an inpekna tluangtling kha a ropui takzet a. Mizote rilru-ah thil nasa takin an tuh a, Mizoramin he dinhmun hi a thlen theih phah a ni,” a ti.

“Mizoram hian India-in hma a sawnna kawngah hna ropui tak a thawk a, vawiin hi ni chhinchhiahthlak tak a ni a, ram pum, a bikin Mizoram mipuite tan a hlu. Vawiin atang hian Aizawl chu India railway map-ah a tel tawh dawn a ni,” a ti a. Mizorama rel a luh theihna turin lung a lo phum tawh a, a hawnna hun a nei leh chu lawmawm a tih thu a sawi.

Sairang rel kawng a tlang theihna atan hian chona nasa tak hmachhawn a ni thu leh Sairanga rel luhtir tur hian harsatna hrang hrang an tawk a, tlang chhechhe tak tak verh ngai te, khuar thuk tak tak hnawh ngai leh lei sang tak tak dawh a ngaih tih sawiin, tun thleng tur hian engineer-te leh thawktute thahnemngaihna leh inpekna a fakawm a tih thu a sawi.

Modi chuan, “Kan thinlung chu a hma pawhin a inhnaih a, tunah chuan Sairang, Mizoram chu Delhi nen Rajdhani Express hmangin a inthlunzawm tawh dawn a. Tunah hian rel kawng hi a tlang satliah mai lo a, kan dinkhawchhuah theihna atan min her danglamtu tur leh Mizoram mipuite nun a nawm zawk theihna tur pawh a ni. Kuthnawthawktute leh sumdawngte tan zau zawkin inphochhuahna kawng a hawng dawn a ni,” a ti.

Rel kawng hian mipuite tan duhthlan tur tam zawk a siam thei dawn a, a bikin zirna leh damdawia inenkawlnaah rah tha a chhuah dawn tih sawiin, “Hei hian tourism, transport leh hospitality sector-ah te hna tam zawk a siam dawn a ni,” a ti bawk.

Prime Minister chuan, "Kum engemaw zat kal ta atang tawh khan Political Party thenkhat chuan vote bank politics an kalpui thin a, vote hmuh hnem leh seat lak tam chiah an ngaihtuah thin. He sukthlek avang hian hmarchhak state ho Mizoram pawh telin he thinlung pu hi an tam a ni. Keini hmathlir hi chu a dang daih a, tunhma zawnga ngaihthah ni thin kha hmahruaitu an ni mek tawh. Tun hma lama dah hniam thinte khan tunah chuan a lailum an luah tawh. Kum 11 kalta atanga khan hmarchhak tan hma kan la a, tunah chuan India khalh ngiltu a ni chho ta a ni. Tunah hian India hmarchhak state tam zawk chu India rail map-ah an tel tawh a ni," a ti.

Modi-a chuan Mizoram pawhin RCS - UDAN hmang tangkaiin Thlawhna a zin kawngah a zar a zo dawn a, Helicopter service pawh changtlung zawkin a nei thei thuai dawn a, hmun kilkhawr zawk zinna kawngah nasa takin a pui dawn a ni a ti.

Mizoram hi Act East policy mai bakah India hmarchhak thlunzawm tura hmalaknaah a pawimawh ber tur in ni a, Kaladan Multipurpose Model Transit Transport hmangin Mizoram chuan Bay of Bengal kaltlangin Asian chhim chhak lam te a pawh dawn a. Hei vang hian tourism leh sumdawnna kawngah nasa takin hma a sawn dawn a ni, a ti bawk.

Prime Minister chuan mipuite chu North East Rising Summit-a tel ngei turin a sawm a, tualchhung leh tualchhung indawrna hi a pawimawh a, thiam thil nei te leh kuthnathawktute an hlawkpui dawn a ni. Mizoram mau atanga siam thil te, Organic Sawhthing, Aieng leh Balhla te hian hriat a hlawh tawh em em a, nuamsa zawka nun theihna turin theihtawp an chhuah thu a sawi

GST kalphung thar tur hman hun pawh puan a ni tawh a, thil siam tam takah tax lak nasa taka tihhniam a ni dawn. Chhungkaw tin tan nun khaw­chhuahna a awlsam tawh dawn. 2014 hma kha chuan nitin mamawh toothpaste, sahbawn leh hriak-ah te tax 27% lak a ni thin a, vawiinah chuan 5% bak lak a ni tawh lo a ti.

Congress hunlai khan damdawi, test kit leh Insurance policy-ah te tax nasa taka lak a ni a, chuvangin Healthcare tih man pawh a san phah a, Insurance pawh mitin ban phak a ni lo a, vawiin-ah chuan mitin tan ban phak a ni tawh. GST dan thar hnuaiah chuan damdawi, a bikin natna khirh tak cancer damdawi te a tlawm tawh dawn a ti.

September 22 hnuah chuan Cement leh In sakna hmarua pawh a tlawm tawh dawn. Scooter leh car man te pawh tihhniam a ni tawh a, kumina hunpui hman tur pawh ram pumah a hma zawng aiin thil a awlsam tawh a beisei thu a sawi a. GST a hniam tawh dawn avangin Hotel thlen man te, lirthei chuan man te leh thil dang zawng zawng pawh a tlawm dawn a, tourist pawh an tam phah ngei ang. Tourist tlawh tur hmun nei tha North East ang te hi a zar zo leh zual turin in ni a ti.

India economy pawh tun 2025-26 quarter chhung khan 7% in a thang a, chumi awmzia chu India economy hi khawvelah a thang chak ber tihna a ni, a ti bawk.