Aizawl August 22, 2024 : Mizoram Pradesh Congress Committee te chuan vawiin chhun dar 11 khan Congress Bhavan-ah Adani Company chhui tura ngiatin lungawilohna an lantir.

President Lal Thanzara chuan lungawilohna lantirna chungchang sawiin, He protest leh demonstration neih a nih na chhan hi Modi Sawrkar-in Adani Company hmanga nasa taka mipui sum ti chingpen leh stock market-a sum invest tu, India mipui maktaduai tel te sum cheng vaibelchhe sing tam tak hloh tir an nih chungchanga chhuitu Security Exchange Board of India (SEBI) Chairman pawh he thil dik lova inhnamhnawih ni ngeia a lan avanga chhui that duh loh leh thil dik lo chulmam tumna awm ni ngeia a lang duh lohna lantirna a ni.

"Adani Megascam chhui tura Joint Parliamentary Commitee ruat turin Narendra Modi Sawrkar kan phut a ni," an ti.

India rama hnam hnufual zawk ten an chanvo dik tak an chan theih nan Caste Census neih thuai an phut bawk. India ram hnam hnufual te socio-economic status dik tak hriat a nih theih nan caste census hi tihmakmawh a ni, an ti.

Hei bakah hian India Danpui (Constitution) zah leh zawm a nih a, mipui ten chanvo leh zalenna neih te humhim a nih ngei nan thu mai ni lova, a taka hma la turin Central sawrkar an ngiat bawk a ni, tiin a sawi.

He hunah hian Sr. Vice President Lalnunmawia Chuaungo pawhin SEBI chairperson Madhabi Puri Buch leh a pasal te chu Adani group tena stock manipulation an kalpui danah inhnamhnawih ngeia hriat an nihna te, SEBI ngei pawhin Adani stock market manipulation rei tak an chhui tawh chunga thumum an neih theih loh danah te thil fel lo a awm ngeia ngaih a nih thu te a sawi bawk.

August 13, 2024 khan All India Congress Committee Headquarters, New Delhi-ah AICC President Mallikarjun Kharge, Lok Sabha Leader of Opposition Rahul Gandhi, AICC General Secretary-te leh Pradesh Congress Committee President-te meeting in an rel angin vawiin August 22, 2024 hian India ram hmun hrang hranga Enforcement Directorate Office-ah leh hmun pawimawh dangah protest leh demonstration neih a ni a.