Gambia coach Tom Saintfiet chuan Zirtawpni zanlaia an team-in Morocco-a lirnghing na tak an tawh chu an thlenna khualbuk chungah thlawhnain a tum hnan ta mai emaw a tih hial thu a sawi.

Belgian manager leh a naute hi Pathiannia Marrakesh-a Africa Cup of Nations qualifier-ah Congo hmachhawn tura awm mek an ni.

Moroccan interior ministry chuan lirnghingah hian mi 820 chuang an thi tih a sawi a, an pun ngei erawh rin a la ni.

Magnitude 6.8-a na lirnghing avang hian Marrakesh leh khawpui dangah mi an chiaiin kawtthlerah mi an phili nasa hle.

Saintfiet chuan an thil tawn chuan ‘a barakhaihin a hlauhawm hle’ tih a sawi.

“A tira thawm bengchheng tak ka hriat kha chuan ka kawngka an rawn kik dawt dawt emaw ka ti a,” tiin BBC World Service hnenah a sawi.

“Second hnih khat hni velah erawh chuan thlawhna tumhmun bul lawka thleng kan nih bawk si avang khan kan khualbuk chungah thlawhna a tum ta mai emaw ka ti a; mahse, lirnghing a ni tih ka hre leh ta thuai a ni,” a ti.

“Second 30 emaw chauh kha a ni a; mahse, a tawp thei dawn lo ni maiin ka hre hman a. Bangte chu a insawi a, ceiling leh bang atangin thil a tla chum chum a, khatiang reng renga in che nasa kha ka la hre ngai lo,” a ti.

“A nghin zawhah khan ka tlan chhuak nghal a, ka team member-te ka en nghal a, anni pawh an pindan atangin an lo chhuak ve vek tho va. Pawnah chhuakin tui chenna hmunah kan kal a, pindana let leh chi a ni rih lo tih min hrilh avangin pawnah hian mikhual dangte nen kan riak ta a ni,” a ti.

“A rapawm tak zet a. Zankhuain ambulance thawm kan hria a, chanchinthar kan bih deuh reng a. Hun tawn rapthlak ta a ni,” a ti bawk.

Pathiannia an inkhel tur hi nakuma Ivory Coast-in an thlen tur Afcon-a inlan tur zawnna a ni a. Gambia hian an ramah ram leh ram inkhel thlen theihna khawp khelmual an neih zawh loh avangin Moroccan khawpui pakhat, Marrakech-ah hian mikhual an thleng ve thin a ni.

Confederation of African Football (CAF) leh Moroccan FA chu indawrin Inrinnia Agadir-a Morocco leh Liberia inkhel tur chu an thulh nghal.

CAF chuan, “National football chhungkua chuan a tuartute kan tawrhpui tak zet a, hliam tuarte pawh rang taka dam turin duhsakna a hlan,” a ti bawk.

Morocco leh Paris St-Germain defender Achraf Hakimi pawhin social media-ah, “Ka khua leh tui nihpui zawng zawngten hun khirh tak kan paltlang mek a. Nunna chhan tura mi tin inpuih tawn kan ngaih hun lai a ni a, an duh tak chântute ka tawrhpui takzet a ni,” a ti.

Saintfiet-a hian a naute zingah hian February thlaa Turkey-a lirnghing rapthlak tak, Newcastle player hlui, Christian Atsu-a pawh a thihna kha an lo tuar tawh tih a sawi a, rapthlak an ti tak zet tih a sawi.

“Player eng emaw zat hi chuan naktuka inkhelh an duh lo,” a ti.

“Infiammi kan ni a, Afcon khelh phak ngei chu kan duh a; mahse, tunah rih hi chuan player-te rilruah hian football a awm rih hlawl lo. He khawpuia thi tam tak an awm laia football lo khelh hi a finthlak em? October-ah kan khel thei mai lo em ni?” a ti.

“Tunah rih hi chuan rilru-ah football a awm hlawl lo va, Morocco leh Marrakech-a chengte leh player-te himna chiah a awm rih a ni,” a ti.