Aizawl; Nimin zing dar 5:30 vel khan Champhai atanga Seling thlen hma, Water Point bul-ah Zokhawthar atanga Aizawl-a tlan Scorpio MZ 01/J - 3066 chu chesualin a chuang te hian hliam an tuar vek a, an zinga 1 hi Thingsulthliah damdawiin ah a boral. Motor ah hian Lalrintluanga (33) Falam khua, tuna Aizawl Electric venga khawsa te chhungkua bakah driver nen mi 5 an chuang a, midangte chu Rosy VL. Hnemi (27) w/o Lalrintluanga Falam khua leh an fate pahnih Joseph Lalzabiaka (kum 2 leh thla 10), Jerry Zohmangaiha (thla 4 mi) leh motor khalhtu Mangthiampaua (19) Darlawn khua te an ni. Hliam te hi Thingsulthliah PHC panpui nghal an ni a, an zinga hliam na ber Jerry Zohmangaiha (thla 4 mi) hi damdawiin thlenpui anih hnu lawkah a boral zui a ni. Hliam dangte erawh ngaihtuahawm lutuk an nilo. Vanduaina thlen chhan chiah hi hriat a ni lo a, thil awmdan chhui mek a ni.