Mizoram sorkar chuan tunlai hian Minister/Parliamentary Secetary te hman tur motor thar lei tumin ruahmanna a kalpui meka sawi a ni a. Party thenkhat chuan sorkarin motor thar lei a tum hi tul lo an tih thu leh Mizoram sorkar sum dinhmun a chhiat em em laia motor thar man to tak lei tuma sorkarin hma a la chu an ngaihthiam loh thu an sawi. Motor thar hi a taka lei a la nih loh avangin mipui lam atangin chuti taka dodalna a la awm rih lo niin a lang. Motor thar lei chungchangah hian Chief Minister chuan, motor leina tur hi budget-ah an telh vek thu leh mamawh ang zia zelin lei zel a nih tur thu a sawi a ni. Mizoram sorkar sum dinhmun pachhiatzia leh hei hian mipui mimir pawh nasa takin a nghawng tih chu zep rual a awm lova, amaherawhchu, heng minister-te hian motor thar hi eng ang dinhmun atanga tehin nge an mamawh tih hi an lei hma in mipui hnenah hrilhfiah sela a tha hle ang. Road tax leh thil dang dangah chhiah lak belh a ni a, road tax ngat phei chu sawisel kai tak chungin, siamthat mumal awm lovin tun thlengin kalpui a la ni bawk. Lirthei neitute hi mi hausa an ni vek lova, neihthinglungkhawnga mahni kea din tuma eizawnna nghet neih beisei loan la pawh tamtak an awm! Neih chuang liama lei chu tam an ni hauh lo ang. Mizoramin sum leh pai thawhhchhuah mumal a neih miau loh avangin Chief Minister, Minister leh MLA te tana motor thar tha ber ber chhawpsak hi a inhmeh hauh lo tih hriat a pawimawh hle. State hausa leh sum leh pai dekchhuak tam te chuan lirthei changkang ber ber an lo leisak a nih pawhin thik tur a awm lo. Sorkar hmasa lamah pawh minister te motor hman turin cheng nuai tamtak senga lei a nih avangin mipui an phun nasa a, mahse, thlantlin an nih tawh avangin mipui an hlau vak lo nge, Adviser to Chief Minister thlengin motor an chhawpsak a ni. Tunah Mizoram sorkar tharah MLA thar/Minister thar an awm nual a, hengte tana leisak an lo ni ta a nih pawhin mipuite chuan an hrethiam theiin a rinawm. Amaherawhchu, sorkar term thar chuankai apianga sorkar siamtute apiangin motor thar an inleisak zel dawn a nih chuan a fel lo hle ang. Budget-ah dah a ni emaw, ni lo emaw, Mizoram dinhmun nen a inmil lo tih pawm ngam a tul. Sorkar hnathawk, a field tak taka thawk, lirthei mamawh tak tak engemawzat an awm laia, a hotu lawk bawra lirthei man to leh tha inchhawpsak thin hi thil chin chhunzawm tlak pawh niin a lang lo. Motor fit tha leh nalh pangngai chu Minister/MLA te hian an mamawh ngei ang, amaherawhchu, sum harsat thu an sawikhum thin, anmahni thlang tlingtu mipuite mitmei tal an veng ve tur a ni ang.