Aizawl March 31, 2024 : April 19, 2024-a Mizoram Lok Sabha MP thlan lo awm turah candidate paruk an awm dawn a. Candidate-te affidavit atanga a lan danin Indian National Congress candidate Lalbiakzama chu a hausa ber.

MP inthlan atana inhnuhdawhna ni hnuhnung ber, nimin chhun thleng khan inhnukdawk an awm hriat a ni lo a. Lok Sabha seat khat chuh tur hian Vanlalhmuaka (BJP), Lalbiakzama (INC), K.Vanlalvena (MNF), Richard Vanlalhmangaiha (ZPM), Rita Malsawmi (PC) leh Lalhriatrenga Chhangte (Independent) te an ding dawn a ni.

Candidate-te thil neih tar lanna affidavit atanga a lan danin INC candidate Lalbiakzama chu candidate zinga hausa ber a ni a. Lalbiakzama (64) s/o Zasiama (L), Model veng hian Rs. 10,000 kawlin bank hrang hrang bakah lirtheite nen a sum neih chu Rs. 1,04,20,000 niin hei bakah hian agricultural land a nei bawk.

BJP candidate Vanlalhmuaka (53) s/o Laldingliana (L), Thuampui veng hian pawisa fai Rs. 10,00,000 neiin bank-a a pawisa neih nen a vaia a sum neih chu Rs. 11,30,075.19 a ni a, lirthei leh agricultural land neih a nei lo a ni.

MNF candidate K.Vanlalvena (54) s/o K.Lalzika, Tuikhuahtlang hian Rs. 13,00,000 neiin bank-a pawisa a neih bakah lirthei a neihte nen a vaia a hausakna belhkhawm hi Rs. 58,36,347 a ni a, agriculture land a nei bawk a ni.

Mizorama rorel lai, ZPM candidate Richard Vanlalhmangaiha (46) s/o Lalzawma, Venghlui hian Rs. 30,000, bank, LIC policy leh lirtheite nen a hausakna belhkhawm hi Rs. 97,74,434 a nei a, lak sawn theih loh ro a nei bawk.

PC party candidate Rita Malsawmi (49) d/o F. Vanlalruati, Kolasib Venglai hian pawisa fai Rs. 10,000 neiin bank, lirthei leh thil dang a neihte nen belhkhawmin Rs. 16,60,000 hu a nei a, agriculture land a nei lo.

Independent candidate Lalhriatrenga Chhangte (59) s/o C. Kaphnuna (L), Kulikawn hian Rs. 50,000 neiin bank leh lirtheite nen a hausakna belhkhawm chu Rs. 6,75,000 a ni a. Lalhriatrenga Chhangte hi a nupui ram neih hlut zawng nena chhut chuan a thil neih zawng zawng hlut zawng hi vbc. 2.7 a tling a ni.