Aizawl March 21, 2024 : Vawiin khan Mizoram Pradesh Congress Committee President Lal Thanzara chuan 2024 Lok Sabha Inthlan atana Mizoram-a INC candidate tur atan Home Commissioner hlui Lalbiakzama, MPS (Rtd.) a puang. MNF nen candidate intawm siam tumin hma an lak thu a sawi bawk.

Lal Thanzara chuan kumin Inthlana Congress in an thupui ber tur chu ram, sakhua leh mipui himna a nih thu a sawi a, hemi tur atan hian an candidate Lalbiakzama chu he hna thawk tur hian a tling tawk a ni a ti a, Parliament House atana au chhuak turin sap tawng leh vai tawngah pawh buai lo tur a ni, a ti.

Chanchinthar lakhawmtute zawhna chhangin MPCC Vice President chuan MNF party te nen candidate intawm nei tura inbiakna a awm leh awm lo chungchangah inbiakna a awm ngei tih a sawi a, mahse, MNF chu Congress-in an beih ber BJP leh a thawhpui NEIDA leh NDA zawm an nih avang leh an thawhhona hi an chhut chah theih loh avangin a hranpa-a candidate pawh dah ta an nih thu a sawi.

Congress candidate tur Lalbiakzama hi March 1, 1960 khan Aizawl Venghlui-ah a piang a. Mizoram buai tirhteah a nu in Silchar lamah a pi Kaithiangi hnenah a tlan thlakpui a.

Vairamah seilianin kum 1979 khan Mizoram-ah an rawn chuang chhuak leh a. English leh Hindi thiam nal tak a ni. Kum 1988-ah Mizoram Police Service a zawm a. Hmun hrang hrangah awm kualin UN Mission hnuaiah Bosnia leh Kosovo-ah pawh lo kal tawh a nia, UN sipai tur training pe phak hial a ni.

Kum 2012 June thlaah Home Department-ah Joint Secretary a post a ni a, Home Department-ah hian a pension thleng awmin Secretary thlenga kaisangin Mizoram Police Service atanga Home Secretary ni hmasa ber a ni.

Mizoram Police Service Association ah tum thum President-ah thlan tlin a ni a, a pension thlengin president nihna a chelh a ni.

Lalbiakzama hian a nupui Laldingliani nen fapa pathum leh fanu pakhat an nei a. Model veng, Aizawl-ah an cheng mek a ni.