Aizawl : Member of Parliament (Rajya Sabha) thlanna lo awm turah nimin June 6, 2020-a MPCC Elected Office Bearers Meeting chuan MPCC Official candidate atan Dr. Lallianchhunga, MPCC Spokesperson leh Media Department Chairman ni lai mek chu a ruat.

MPCC hian candidate atana PC Zoramsangliana chu an lo puang tawh a, remchan lohna a awm avangin nimin khan Dr. Lallianchhunga hi ding turin thu an titlu leh ta zawk a ni.

Dr. Lallianchhunga hi Deptt. of Political Science, Mizoram University a Associate Professor hna thawk lai mek a ni. MZU-a a thawh hma hian Pachhunga University College leh MZU-ah Guest Lecturer-in a lo thawk tawh bawk.

Mizoram sorkar hnuaiah chanvo pawi-mawh tak tak alo chelh tawh a, Member, The Mizoram Municipality Act, 2007 Amendment Committee, 2009-2010 ; Member, Drafting Committee of the Mizoram Local Government (Panchayati) Act,2018 ; Member, NLUP Implementing Board, 2009-2013 ; Member, Study Team on Conversion of VC into PRI leh Mizoram State Coordinator -Lokniti (Centre for Comparative Democracy) leh Centre for the Study of Developing Societies (Delhi) te a lo ni tawh.