September 26, 2023; Vawiin hian Champhai South bial chhung Zokhawthar Bazarah Congress Unit huaihawtin Street Campaign buatsaih a ni a. He hunah hian Champhai South bial a Indian National Congress (INC) atanga ding tur Dr. Lallianchhunga, MPCC Spokesperson leh Gen.Secy ni bawk chuan thu a sawi.

He hunah hian Dr.Lallianchhunga chuan thusawiin, “Champhai leh a chhehvel mipuite hi sumdawnna kawnga Mizo hnam kawngkhar vengtu in ni a. Sumdawnna hmanga Mizo hnam hi chimrala kan awm lohna turin theihtawp kan chhuah a ngai a. Sumdawnna kawnga inchimralna hi inlehthal a har tawh avangin tharum (Revolution) a hring chhuak fo thin a ni. Kan chhehvel hnam, Tripuri leh Cachari te pawh chimral an ni tawh a. Hnam tangrual kan nih thinna hi sumdawnna kawngah pawh kan lan chhuah tir a ngai dawn a. Marwari sumdawng te angin kan chipui tanpui ngai an awm chuan kan intanpui tawn zel a la ngai ang. Hei hi hnam anga kan dinchhuahna tur atan pawh a pawimawh hle a ni" a ti.

MPCC Spokesperson Dr.Lallianchhunga chuan, “Kan ram, kan hnam leh kan sakhua a dam khawchhuah (survive) nan Congress party hi Pathianin hmanrua atan a buatsaih mek a. National party tan lo chuan Kristian te nekcheptu Central BJP khu hneh theih a ni lova. Kohhran mipuite tawngtaina zarah Congress party kaihhruai Tangrual Pawl, I.N.D.I.A. hian India ramah sakhaw zalenna a awm zel theihna turin Central BJP khu a hneh ngei a beiseiawm,” a ti bawk.

“Kan ram, kan hnam leh kan sakhua a dam khawchhuah nan hnam anga kan tanrual a ngai a. ZPM leh MNF chhuahsan kher a ngai lova. Hnam anga kan tanrual angaih zawk avangin Central BJP paihthla turin Mizoram atanga bul kan tan a ngai a, chumi atan chuan kan awmna party dah thain, Congress party candidate vote vek turin ka sawm che u a ni," MPCC spokesperson chuan a ti.