Aizawl September 2, 2024 : MPCC Sr. Vice President Lalnunmawia Chuango chuan corruption chungchanga thuthang hi thudik a ni mai awm mang e tih theih turin Chief Minister thusawite leh ZPM sawrkar hmalakna a lo awm bawk si hian ngaih a ti tha lo, a ti, a hnena ngenna ziaka an thlen tawh chu tihlawhtlin sak ngei turin an ngen nawn.

Nimina thuthar thehdarhtute a kawmnaah Chuango-a chuan Corruption vulh lian thei zawnga hmalakna an hmuhte chungchangah Press Conference te neiin, Chief Minister hnenah pawh lehkha an ziak tih a sawi.

CBI hnena Consent pek chungchanga rawtna leh ngenna, July 10, 2024-a an pek leh ZPM Sawrkarin Mizoram Lokayukta Act, 2014 a tih danglam (amend) chungchanga rawtna leh ngenna July 11, 2024 Chief Minister hnena an pekte chu thla hnih dawn a ral hnuah pawh a chhanna an la hmu lo mai ni lovin acknowledgement pawh an la dawng lova. Heng an rawtnna leh ngenna te tih hlawhtlin tuma hmalakna an neih pawh hriat tur a awm lo, tih a sawi.

Congress chuan Mizoram Lokayukta chu ram tana corruption do tura Institution pawimawh ber a ni a. Mizoram Lokayukta (Amendment) Act, 2024 hmanga he Institution pawimawh tih thuanawpa a awm chungchang a rawtna leh ngenna Chief Minister hnena July 11, 2024 hmanga kan pekte hi tih hlawhtlin ngei a pawimawh avangin bawh zui ngei tulin an hria a ni.

MPCC lehkhaah hian hetiang hian ngenna hi tarlan a ni. "He lehkha a kan rawtna leh ngenna [1] Investigation Wing leh Prosecution Wing te ti changtlunga, heng Wing pahnih hotu lu te dinhmun pawh Additional Secretary levela dah let tura kan ngenna; 2) Lokayukta dinhmun leh thuneihna ti dal tura Section 13(3) a proviso an tih danglam paih leh tura ngenna; [3] Lokayukta pawimawhna ti dal tura Section 14 a proviso an belh paih leh tura ngenna; [4] Section 19(5) leh Section 28(1) ti danglam a, Lokayukta in State sawrkar phalna la hmasa lova CBI a hman theihna an chhuhsak leh State sawrkar phalna la hmasa lova State sawrkar hnuaia hnathawk (public servant) te chhui theihna an chhuhsak pe let tura ngenna; [5] Mizoram Lokayukta in State sawrkar phalna la hmasa kher lova State sawrkar hnuaia thawk, public servant-te a chhui theih nana Section 22(1) leh 22(2) hnuaia Section 17A of Prevention of Corruption Act, 1988 belh tura ngenna te ti hlawhtling turin kan ngen nawn leh a ni," an ti.