Aizawl December 15, 2022 : MPCC President Lalsawta chuan vawiin khan Congress Bhawan-ah chanchinthar lakhawmtute a hmachhawn a, Inthlan lo awm tura sum seng tlem turin politician te a ngen a, sum enkawl kawngah sawrkar chu a hlawhchham nia a hriat thu te, mipuiin sawrkar an ring ngam tawh lova a hriat thu te a sawi. 

Lalsawta chuan, "Kum 2023 Inthlan hi Mizoram tan hian a pawimawh dawn em avangin he inthlan lo awm tura inthlan leh a kaihhnawiha sum seng tlem turin politician-te leh ram mipuite ka ngen a ni. Congress Party-ah chuan kan inhrilh fo tawh a, Congress Party mipui te pawh kum khat chhung chauh hi lo insum tur leh kan Candidate-te phurrit siamsak lo turin ka ngen tawh a. Inthlan kaihhnawih sum leh therhlo laka kan fihlim theih chuan kan ram chhiat zelna tur kan dang let dawn a. Hei hi Election Commision of India (EIC) leh Mizoram People Forum (MPF) duh dan pawh a ni. Sawrkar thianghlim tha, chak leh hnathawk thei siam nan he inthlan lo awm tur hi a tha zawnga ramin a bul tanna a ni ang," a ti.

Sawrkar sum enkawl dan fuh tawk lova a hriat thu sawiin MPCC President chuan, "Sawrkar sum enkawl chungchangah hian leiba a pungin ram rohlu kan sim theihna tur tam takah Central Sawrkara Ministry leh Department tam takte hna thawhna tura State Matching Share (SMS) pawh kan pe hlei thei lo va, Sum enkawl kawngah hian sawrkar hi a hlawhchham niin ka hria. Planning Commision awm tak loh hnua Central sawrkar leh State/UTs te inkara Financial Transaction kal dan hriat fuh loh vang niin ka hria. Kum tam tak Planning Commision kha PLAN sum bawm a ni thin a, a awm tak loh hnu hian ram hmasawnna tur hi Central-a Ministry leh Department te Programmes leh Schemes mila thawk thei tura SMS leh hnathawh tur tha leh fel fai Detailed Project Reports (DPR) neih hi a pawimawh ta a ni," a ti. Lalsawta chuan kan GST hmuh that dan atangin central atanga sum hmu hnem tur kan ni lo tiin Enkawl thiam se chuan heti taka sum puk hnem tur niin a hriat loh thu a sawi bawk.

Ram rorelna a fuh tawk loh thu sawiin, "Ram tana pawimawh ber fo chu Good Governance (ram leh mipui enkawlna tha), danin ro a relna hi a ni. Vawiinah hian ram mipuiin Sawrkar ring zo lovin anmahni kutah ram rorelna an kengkawh tan ta emaw tih theih hial a ni ta a. Sawrkar nei lo ang hiala kan ram a awm ta mai hi a pawi tak zet a, diknaa rorel tur sawrkar kan mamawh a ni," a ti a, Sawta chuan Kuhva chungchanga sawrkarin hma a lak loh vanga thil thlen dan chu pawi a tih thu a sawi a, chhak leh thlang chhim leh hmar te inkarah thil duhawm lo a chhuah a hlauh thu a sawi bawk. 

Sawta chuan Covid-19 in kum hnih zet min hrual beh hnua zalen taka Krismas leh Kum Thar hman a ni tur chu lawmawm a tih thu a sawi a, hlim leh nuam taka hmang turin Mizoram mipuite duhsakna a hlan bawk.