Aizawl May 1, 2023 : April 4, 2023 khan Zodintluanga Ralte chuan MPCC Treasurer atanga a banna lehkha President hnenah a thehlut a, hun engemaw chen ngaihtuah lova a awm hnuah vawiin khan MPCC elected Office Bearer te chuan chanchinthar thehdarhtu te an hmachhawn a, he hunah hian President Lalsawta chuan Zodintluanga duhthu ang ngeiin a banna thehluh chu pawm a nih thu a puang.

MPCC President chuan banna thehluh chungchangah Congress Party senior te chuan Treasurer nen hian inhmu thuai turin an rawn a. Mahse, banna a thehluh hnu hian Zodintluanga hi a zin chhuah avangin an inhmu thuai thei ta lo a, thutlukna siam pawh hi a tlai phah ta niin a sawi, banna thehluh hian party chhungah chiaina a siam avangin pawi a tih thu a sawi bawk a, party mipui te ngaithiam turin a ngen.

Lalsawta chuan, "April 30, 2023 khan ka chennaah kan inhmu ka, Rilru inpawh tak leh uluk taka kan sawi dun hnuah an party that leh chak zawk nan hetiang thutlukna hi an nei ta a ni. Pu Zodintluanga hi ui tak chungin Treasurer a nihna atanga a banna hi ama rawt leh duh anga pawm thuai ni se kan ti ta a ni," a ti bawk. 

MPCC President chuan, "Party-a thawhhonaah hian ngaihdante a inan loh chang awmin lungrual thap theih loh chang awm thin mah se, dawh thei taka kan inhriatthiam tlan zel hi a ngai thin. Vawiinah pawh hian kan pahniha inkarah ngaihdan leh duh dan a thuhmun lo a nih pawhin mimal inhuatna engmah kan nei lova, Pu Zodintluanga Ralte hi MPCC Treasurer ni tawh lo mah se, Party thatna tur chuan theihtawp chhuah a inhuam a, a banna hi pawm a ni ang a, a aia MPCC Treasurer tur chu kan Party hotute'n an la ngaihtuah ang, kan ti a ni," a ti.