November 29, 2022; Mizoram People Forum (MPF) leh political party hruaitute'n vawiin khan Central YMA Committee Room-ah thawhhona tur thuthlung duan an thlirho a, ruahmanna thenkhat siam that a ni a, house to house campaign neih loh ni se tih an rawt.

Inkawmhona hi MPF president Rev. Dr. Vanlalnghaka'n a kaihruai a, political party hrang hrang - Congress, MNF, MPC, ZPM leh BJP aiawhte an tel. MPF-in thawhhona thuthlung tur a duan hi thupui pariat - inthlan, inthlan senso, inthlan campaign, zalen taka inthlan leh venhimna, policy siam, candidate chungchang, thawhhona leh tlangkawmna tia then a ni.

Thawhhona thuthlung tura rawtna siam thar/tih danglamah, House to house campaign chu candidate te tan leh MPF tan pawh a hautak thu tarlan a ni a, dan phal baka sum hman sual theihna remchang tak a nih theih bawk thu tarlan niin, hemi vang hian House to house campaign chu neih loh ni se, candidate ten hun leh hmun inang tlangah thu an sawi theih nan common platform siam a ni thung ang.

Hemi bakah hian, mipui vantlang tana ei leh in siam - ruai, chawhlui kil ho, sawhchiar pir leh a chi dangte, picnic te a hautak avang leh, candidate te tan ngei pawh sum tam tak sen theihna a nih thin avangin tih loh tur a rawt a ni a. Party te tan election information centre neih theih a ni dawn lo a, candidate te campaign a an kal velna a an iptepui banna tur (station) an siam thei bawk ang.

Kum 2018 inthlan atana thawhhona thuthlung lo siam tawh tam zawk chu a ngai anga rin zui tur a ni ang a. Thuthlung awm sa siamrem hret engemawzah a awm bawk.