Aizawl May 6, 2024 : Vawiin khan Mizoram Public Service Commission (MPSC) Chairman J.C.Ramthanga IAS (Retd) chu MPSC a thawh hun bi a lo tawp tak avangin superannuation pension in a chhuak a. He huna thu a sawinaah India President in a ban a nih ngawt loh chuan tumahin MPSC Chairman bang tura nawr chi a ni loh thu a sawi.

Ramthanga chuan MPSC chu India ram Danpui, Constitution a chuang, constitutional body a nih angin Chairman leh Member te ruat theih dan leh ban theih dan tur pawh tarlan vek a ni a. Criminal case avanga Supreme Court in thiamloh a chantir a bang tlaka a ngaih a, India President in a ban a nih ngawt loh chuan tumahin Chairman bang tura nawr chi a ni lo, a ti a. Tunhnaia MPSC in beihna a tawh ah thawktute tanrualna chu lawmawm a tih thu sawiin Chief Minister meuhvin press mite hma ah inquiry report ah MPSC dik lohna an hmuh loh thu leh report chu sawrkarin a pawm tih a sawi chu a lawmawm, tiin MPSC zahawmna humhalh a, a zahawmna leh rintlakna vawng nung zel turin officer te leh staff te a fuih.

Amah thlahna hunah hian J.C Ramthanga chuan kum 2 vel Chairman a nih chhunga MPSC hmasawnna leh hlawhtlinna - building tih changtlun te, Officer leh staff te service siam that leh, state dangte tihdan tha entawn chunga MPSC examination kalphung siam danglam ngaite tifel tura theihtawp a chhuahna ah Secretary leh officer te bakah staff ten nasa taka an tawiawmnaah lawmthu a sawi a. Heng hmasawnna hnathawh te hi lehkhabua siam a ni tih tarlangin a hun chhunga MPSC in hmasawnna a neih te chu officer leh staff te thahnemngaihna leh inpekna avanga awm thei a ni, a ti a. Thawhhona boruak tha chu lawmawm a tih thu a tarlang a ni.

J.C. Ramthanga hi kum 1989 ah IAS a lut a. Manipur cadre niin Manipur state sawrkar hnuaiah kum 25 leh Mizoram state sawrkar hnuaiah kum 8 office pawimawh tak tak chelha a thawh hnuin a service a bahlahna awm lovin May 31, 2022 khan Mizoram sawrkar atangin pension in a chhuak a. June 21, 2022 ah Chairman MPSC hna zawmin kum 2 a thawk a, May 6, 2024 hian a hna a chawlhsan ta a ni.