Aizawl August 1, 2024 : Mizoram Public Service Commission-in Mizoram Civil Services (Combined Competitive) Preliminary Examinations - 2024 a buatsaih-ah candidate 3788 zinga mi 344 ten Mains exam an hmachhawn thei dawn a, Unreserved posts 33 leh Reserved for PwBD (Partially Deaf) post 1 an inchuh dawn a ni.

Mizoram Civil Services (Combined Competitive) Preliminary Examinations 2024 atan hian mi 5854 te'n application an thehlut, mi 3788 in exam an hmachhawn a, 27.06.2024 (Thursday) khan Mizoram chhung Exam Centre hrang hrangah exam hi buatsaih a ni.

Tun tumah hian Unreserved posts 33 leh Reserved for PwBD (Partially Deaf) tan post 1 lak tur a ni a. MPSC Dan hmanlai mek ang chuan Unreserved Candidate atan hian Main Examination thu thei tura Preliminary Examination paltlang tur mi 330 (No.of post x 10) an nih laiin, a hniam lama awm mi 15 te mark hmuh a intluk tlang a, mi 344 te Main Exam bei thei turin an tlin phah ta a ni.

PwBD Quota atanga Post 1 inchuh turin mi pahnih (2) tling an awm bawk a, Unreserved atanga Preliminary Examination paltlang tute zingah mipa 232 an awm a, 112 te hi hmeichhia an ni. PwBD tana reserved-ah Main Exam bei thei tura tling mipa leh hmeichhia 1 an awm bawk.

Preliminary Examination-a tling mi 346 te hian Main Exam atan 14.08.2024 aia tlai lovah Application Form MPSC office-ah an thehluh leh a ngai dawn a, chutah chuan Candidate-te'n an optional paper tur leh an Exam Centre duh, Aizawl emaw Lunglei emaw an thlang ang.