Aizawl; MZP chuan Mizoram District, Mizoram Public Service Commission (MPSC) examination centre la awm ve lohna hmun - Lawngtlai, Mamit leh Kolasib-a Examination centre hawn a ni ta chu lawmawm an tih thu an sawi a. Mizoram sorkarin zirlaite leh thalai lehkha thiamte mamawhna hriaa hetianga District khawpui tina MPSC exam centre a hawng ta chu hmasawnna pawimawh tak a ni, an ti. MZP rorelna sang, Federal Council Sitting in a lo rel tawh, ‘Mizoram District khawpui tinah MPSC exam centre hawn a nih theih nan MZP in hma la rawh se’ tih chu bawhzuiin sorkar thuneitute leh MPSC thuneitute hnenah thlenin hma chak taka lak a ni a, tunah a hlawhtlinna hmel hmuh a ni ta hi MZP chuan lawmawm a ti an ti a. MPSC exam centre district khawpui tina sorkarin a chhawp sak tak avang hian thingtlang atang pawhin hmun hla tak tak pan buai ngai lovin, mahni District khawpui theuhah MPSC hnuaia sorkar hna chi hrang hrangte a exam theih tawh dawn avangin zirlaite a tam thei ang berin MPSC exam centre hi chhawr tangkai turin MZP chuan a chah tih an sawi bawk.