April 23, 2024; Mizoram Public Service Commission (MPSC) hna lak dana thil fel hlel awm ni a puh chhui chiang tura ruat M. Lalmanzuala IAS (Rtd) chuan vawiin a nih loh chuan naktukah report a peih hman a rin thu ZALEN a hrilh.

ZALEN in a biakna ah M. Lalmanzuala chuan, a thil chhuina ah eng eng emaw tihfel tur tlem a la awm tih sawiin, vawiin a an peih hman loh chuan naktuk, Nilaini ah an peih hman a rin thu a sawi.

Tarlan tawh angin MPSC-in Combined Civil Service leh sawrkar hna dang a lak danah thil fel lo a awm ni a puhin MZP chuan MPSC chairman JC Ramthanga, IAS chu bang turin an phut a. A ban loh avangin kar kal ta Thawhtanni atang khan MPSC hnathawkte pisa kal tur an dang a ni.

Thawhlehni khan Mizoram sorkara Vigilance Secretary chuan MPSC hna lakna a thil fel lo awm ni a sawi hi chhui chiang turin Chief Secretary hlui, MPSC-a member leh Chairman hna pawh lo thawk tawh Lalmanzuala chu a ruat a. Ni 7 chhunga an thil hmuh dan report thehlut turin tih a ni.

M Lalmanzuala hi MPSC member-ah kum 4 a awm tawh a, kum 6 chhung chairman hna a lo chelh tawh bawk.