April 16, 2024; MPSC Staff thenkhatte office an kai luih avangin, zanin dar 5:30 khan MPSC Office kawtah MZP hruaitute pungkhawm.

MZP thuchhuah tarlan danin, MPSC hna lakah thil diklo a awm ngeia MZP-in a hriat avanga, MPSC Office kai tur ni hnih chhung dan a nih hnuah, Sawrkarin Inquiry Officer a ruat a. MZP chuan Inquiry Officer chu ring tawkin, ṭha taka hna a thawh theih nan MPSC Office kawta punkhawm chu a titawp rih a ni.

Chutianga MZP-te ngaihtha taka an awm laiin, MZP hruaitute haw hnu dar 3 velah MPSC Controller of Examination (COE) chuan a staff-te office kal tura koin, office a hawn tir a. MZP chuan COE hmalak dan hi a hrethiam lo hle a ni.

Inquiry lak a nih chhung chu MPSC Office hawng lo turin, MZP chuan Home Commissioner a ngen a. Chutih mek laiin, COE in a ruk a ralin MPSC office a hawn tir leh, staff te a tir hian ngaih a ti ṭha thei lo a. MZP chuan MPSC Controller of Examination Zosangzuali Pachuau hmalak dan chu hnu chhui mekna tihbuai tum niin a ngai a, a dem takzet a ni.

MZP-in MPSC hnalak hrang hrangah thilfello tam tak awmin a hria a, hma a lak mek laia hetiang thil thleng hian rinhlelh a ti zual sauh bawk.