CTS (Cheque Truncation System)
He system hi khawl hmanga kalpui niin, he khawl hian cheque te thla lo la zelin a bank neitute hnenah a thlalak hi a thawn zel a, heng cheque neitu bank te chuan an pawisa pekchhuah tur leh dawn tur te chu Clearing House atana an hman YES Bank-ah hian an thawn leh thin a, Clearing House lam hian an pawisa dawn te chu anmahni dawrtu bank lamah hian an thawn ve leh mai thin a ni. Entirnan- MRB, Apex leh MUCO te hian bank hrang hrang atanga an cheque dawn chu CTS hmang hian an dawnna bank-ah te hian a thlalak an thawn a, anni hian an cheque dawn chu a tul dana lo buaipuiin YES Bank kaltlang hian an thawn ve leh thin a ni.

Aizawl : Mizoram tualchhung bank pathum Mizoram Rural Bank (MRB), Mizoram Co-Operative Apex Bank (Apex Bank) leh Mizoram Urban Co-Operative Bank (MUCO) ten Clearing House atana an hman YES Bank chu che thei lova siam a nih avangin dawrtu lam tan dawr hleih theih lo anga thuthang awm chu, bank te hian an sawifiah a, harsatna an neih lem loh thu ZALEN an hrilh.

YES Bank khuah-khirh an nih vanga Mizoram a bank thenkhat - MRB, MCAB & MUCO Bank a account neih te tan hlawh lak pawh buaithlak tur angin thu a thang a, hei hi thu diklo niin an sawi a, anni lam hian YES Bank buaina avang hian hlauhthawn tur engmah a awmlo tih chu an sawi dan a ni thung. MUCO erawh hi chuan kawng engkimah YES Bank hi an lo dawr avangin ATM lamah harsatna an tawk rih a, an customer ten he card hi an hmang thei rih lo.

Heng bank pathum te hian RBI-in system cheque transfer awlsam nana a hman tir, CTS (Cheque Transaction System)-ah YES Bank kaltlang hian cheque clearing hi an ti thin. YES Bank khuahkhirh anih takah hian a hma angin cheque an clear thei tawh lo a, mahse, mipui tan chiai-na tur engmah a awmlo. Cheque hi YES Bank kal tlang kher tawh lovin a cheque an neihna bank-ah direct-in an transfer mai tawh a, YES Bank hi freeze a nih tawh avangin an hnen atanga cheque chhuak a awm tawh loh avangin an buai hran lo, niin an sawi.

MRB chuan YES bank hi Clearing House atan bak an hman loh avangin an inkara sum che vel chu 0.50% bak a tlin loh thu an sawi a, cheque tangkhang pawh an neih loh thu an sawi bawk. "Keini leh YES Bank te hi National Electronic Funds Transfer (NEFT), Real Time Gross Settlement (RTGS), Immediate Payment Service (IMPS) lamah te indawrna hi kan kalpui lo. Hengah te hian keini chuan SBI kan dawr vek a, check clearing atan chiah YES Bank hi chu kan hmang avangin buaina kan nei lo," tiin, V. Lalsawmliana, Chief Manager (Account), MRB chuan ZALEN a hrilh.

Bank pathum te hian bank hrang hrangin Clearing House a hmang turin an dawr deuh vek tawh hlawm niin ZALEN an hrilh a, MRB bik hi chuan anmahni enkawltu SBI lam thutlukna nghah chu fuh zawkin an hre rih a, Clearing House thlak ringawt hi dik theiin an hre lo a, an kalphung a buai phah tam loh avangin anmahni dawrtu lam tan a chi-ai thlak zawk turah an ngai. Apex Bank hi chuan HDFC an ngheng nghal a, hei hi an cheque clear na hmanruaah an hmang a, RTGS leh NEFT atan pawh he bank hi an hmang, hemi hma pawh hian IMPS hmangin pawisa thawnna hi an kalpui reng a ni. MUCO lama hian YES Bank-in harsatna a tawh hnuah IDBI nen an thawk dun nghal a, mahse, ATM bikah hian inzawmna a awm theih loh avangin hetah hian harsatna an tawk mek thung. Apex Bank leh MUCO Bank te hian IFS Code pawh an thlak rih a ni.

MRB, Apex leh MUCO Bank te hian an bank chu a him tawk tih sawiin, Capital to Risk Assets Ratio (CRAR) tehna hnuaiah pawh an dinhmun a tha tih an sawi a, a him chinah an awm reng thu ZALEN an hrilh vek. MRB bik hian Regional Rural Bank (RRB) hnuaiah pawh a ti tha pawl an nih thu te, top 5-ah an awm reng thu leh India sorkar hnuaia RRB board-ah pawh an chairman chu kum engemaw zat member a nih tawh thu ZALEN an hrilh. RRB hnuaiah hian bank 50 vel tunah hian an awm tih a sawi a, heng zingah 15 te hi SBI-in a enkawl bik niin heng zinga pakua te chuan Clearing House atan YES Bank hi an hman thu leh SBI thurawn anga hmang an ni tih a sawi lang bawk.

Heng bank pathum te hian Branch 106 neiin Aizawl bikah hian 29 an nei. MRB hi lian berin Branch 85 an nei a, Aizawl khawpui chhungah branch 19 an hawng. Apex hian branch 20 an nei a, Aizawl khawpui chhungah mipui dawr theih branch 9 leh a bika duan branch khat an nei a, MUCO hi chuan Zarkawta an branch bak an nei rih lo thung.