MSACS sum hmuh tur chu sawrkarin a hrek nia ngaiin hmalakna ti thuanawptu ah MSACS hnathawkte chuan an puha, media ah hmun a luah rei hle. MPC pawhin thuchhuah siamin health department changtu minister an dem bawk a. ARV damdawi an tlakchham thu HIV/AIDS vei intelkhawm te chuan thuchhuahin an thehdarh bawk. Hetih lai hian MSACS hotute chuan chanchinbumite kawmin dawhkan paltlang tur a tam a, sum chevel a muan phah niin an sawi thung a. MSACS hotute thusawi leh a hnathawkte thusawi a inpersan leh lutuk hi a mak ang reng hle ! Tu mawh nge ni ta ang le? UPA sawrkar tawp lam khan Centrally Sponsored Scheme (CSS) te chu Central chuan state society ah chhung lut tawh loin state sum bawma dah a rel thlu a, state sawrkar chuan society te pe chhawng leh tura duan a ni. He ruahmanna hi hman nghal a ni a, kalphung a danglam thuta thawktute an buai a, remruatna lailawk a awm lo bawk nen, sum transfer ah khaihlak a awm ta thin a, state 35-a society tam zawk chuan harsatna an tawh phah a ni. United Nations chuan natna inkaichhawn theih, mihring nunna la thei te chu a darh nasat hmaa khuahkhirhin sum sen a tlem zawk tih a hria a, ram thang mek leh ram rethei te chu sumin a pui thin. Heng zingah hian HIV/AIDS chu a langsar pawl a ni. India-ah sawrkar thar a pian rualin foreign policy thar a piang a, ‘hmasawnna’ chu thupui ber a ni ta a. UN leh ram dang atanga puihna sum thenkhat te chu PM Modi-a chuan a hnawl a, HIV/AIDS atana puihna sum lo lut thin te pawh a tawp titih a. Indian Health Ministry tan zawh ngaihna a awm lo a, SACS hnena pawisa a pek thin a ti hniam ta a ni. Mizoram chauh nilo, ram pum huapin hun khirh tak kan hma chhawn mek a. HIV/AIDS vei enkawlna damdawi ARV leh hmanraw thenkhat te chu ram pum huapin kan tlachham vek a ni. Hetiang hi kan dinhmun a ni a, keini ang thawhchhuah nei lo, chawmhlawm state tan chuan eng party pawh sawrkar sela hmalak a har khawp ang. Mahse ram hruaitute chu eng dinhmunah pawh ram awm sela khaichhuak tura beisei an ni tho tho a ni. Engpawh nise a bul thut hre hawt loa inpuh vak hian harsatna a sukiang loa, nghawng tha lo tak a hring hial mahna. Sawrkar hnathawk te hian a chhawrtu chu sawrkar a ni a, chumi dintu chu mipui an ni tih hre nawn rawh se. Harsatna a awmin a chhan hre ziktluak loin media an pur hma deuh thin em? Chutih rualin thei reng chung sia sawrkarin a tih tur a ti duh lo emaw hre reng chunga a tih loh tur a ti a nih chuan thuhran daih a ni thung. Sawrkar kalphung pangngai a buai hian political party te’n remchangah lain sawrkar dinglai pawng dem an ching fo thin a, eptu lama an awm lai a nih phawt chuan khawi party mah an fihlim bik lo. Mipui hrilh darh an nih pawhin a nih dan tluantling tarlan ni thin sela belhchian a dawl zawk ang. Ram in harsatna a tawk a ‘engtin nge kan hmachhawn ang?’ tia ngaihtuahna seng tlang tur an ni zawk.