September 25, 2023; Mizo Students' Union (MSU) General Headquarters, Aizawl chuan vawiin khan Mizoram Scholarship Board hotute hmuin, Scholarship la dawng lo zirlai eng emaw zat awm mek te chungchang an sawipui.

MSB hotute chuan kum 2022-23 chhung atana Tribal Scholarship 2nd Installment cheng Nuai 1787.48 chu vawiin (25.9.2023) ah Ministry of Tribal Affairs atanga an dawn thu MSU hruaitute an lo hrilh.

He hunah hian Vice President Laldinsanga leh C. Lalhmangaihzuala, Secretary i/c Publicity te chu an tel.

MSU hruaitute chuan zirlaite'n nghakhlel taka an lo thlir leh mamawh Scholarship 2nd installment, Ministry atanga a lo lut ta chu lawmawm an ti hle a, MSB hotute hnenah pawh a rang thei ang bera zirlaite hnena sem chhuah hna tan thei turin an ngen nghal.

MSB lam pawhin October thla kar thumna vela sem chhuah hna tan theih an inbeisei thu an sawi.

MSU tarlan danin, kum 2022-23 chhunga zirlai Scholarship la dawng lo zirlai 19,532 an la awm mek a ni.

Mahni bank account dik tawk lo zirlai 176 te chuan Mizoram Scholarship Board ah Office hun chhungin MSB hotute an dawr a theih reng a, a hmun ngeia Office dawr theilo te tan, MSB Office number 8730075005 -ah hian dar 10:00 am atanga 3:00 pm inkarah biak mai theih an ni.