ZALEN Dec.11. 2024; Mizo Students Union (MSU) chuan school thenkhat a scholarship khawihtu, Institutional Nodal Officer te inthlahdah vanga zirlaiten scholarship an dawng lo tur chu pawi an ti hle tih an sawi.

Vawiin a Aizawl Press Club a thuthar thehdarhtute an kawmna-ah he thu hi sawiin, MSU president B. Lalkhawngaihzuala chuan, Cherhlun HSS (Adhoc) a zirlai scholarship dilte chu an school in verification an tihsak loh avangin scholarship kuminah an dawng thei dawn lo tih a sawi a, MSU chuan pawi a tiin, a thawktute an dem takzet tih a sawi.

Thu an dawn danin, Lungrang 'S' High School (Adhoc) a thawktute chuan scholarship buaipui an thiam loh chhuanlamin an zirlaite tan an buaipui thei lo niin an hria tih MSU president chuan sawi bawkin, zirtirtu naupangte tana intuaithar peih tawh lo leh ngaihsak peih tawh lo an awm chu pawi an ti takzet tih a sawi bawk.

MSU tarlan danin, scholarship hi Class IX leh X zirlaiten Pre Matric Scholarship an dil thei a, a chung lampang zir ten Post Matric Scholarship an dil thei bawk a, zirlai zawng zawngte scholarship dil vek turin an hriattir.

Kum 2023-24 a Mizo zirlaiten scholarship an dawn tur chu tunah hian 1st leh 2nd installment sem zawh a ni tawh a, 3rd installment buaipui leh mek a ni. Tunah hian la dawng lo Post Matric ah zirlai 5,450 leh Pre Matric ah 1155 an awm mek a, scholarship board thawktuten theihtawpa hma an laknaah MSU chuan lawmthu an sawi.