ZALEN December 15, 2023 : Mizo Students’ Union (MSU) General Headquarters, Aizawl chuan 2023 atana Office kharna programme chu vawiin khan MSU Pisa Puiah a buatsaih. MSU Office khar programme hi Lalramhluna Fanai, General Secretary chuan a kaihruai a. ECM Nl. Lucy Lalrinpuii, Missionary, Tinsoung, Manipur chuan tawngtaina hun a hmang.

President Samuel Zoramthanpuia chuan MSU CSR certificate kaltlanga hma lakna vawi hnihna atan Kawnpui College-a Smart Class siamna tur hlanna a nei a, hemi chungchanga MSU leh NTPC inremna thuthlung leh Kawnpui SDO leh College enkawltute duh dan in an loh vanga bungraw inpekah khaihlak a awm chhung hun rei lo tea social media lamah MSU-in chirhtheh a tawk chu pawi a tih thu a sawi.

MSU President chuan National Institute of Technology (NIT) Mizoram chu thuneihna hmang sualtute avanga zirna inrelbawlnain a tawrh phah thu leh hemi avangin Mizo Zirlaiten harsatna tam tak an tawh chungchangah MSU chuan NIT Mizoram humhimna atan tha thawh a tul thu a sawi bawk a ni.

MSU hma lakna kal lai mek Myanmar rama Chin unaute himna atana Federal Democracy din a nih theihna tur te, Bangladesh Chitagong Hills Track-a zohnahthlakte himna tur leh Manipur-a Separate Administration a awm theihna tur atan chawl lova kal zel an tum thu leh Ram leh Zirlaite tan MSU chu a tawp thlengin a kal zel dawn tih President chuan a sawi bawk.

MSU Adviser Lalnunpuia Kawlni leh MSU Founder President Pu K. Laldinthara ten kal khawmte hnenah fuihna thu an sawi bawk a ni. MSU Pisa Pui hi zirlaite leh mipuite dawr theih turin ni 18 January, 2023 hian hawn leh tur a ni.