Aizawl; Kohhran hrang hranga Theological lam zir chhuak leh tuipuitute intelkhawmna, Mizo Theological Association (MTA) chu nimin khan Synod Committee Room No.1-ah thukhawmin, tunhnaia Mizoram sorkarin zu khap burna dan thlahdul a tum chungchangah thuchhuak (voice) neih ve nise an ti. Nimina MTA Executive Meeting hi an President, Rev. Dr. Vanlalchhuanawma, Principal, Aizawl Theological Colllege chuan kaihruaiin, Mizoram sorkarin kum 18 vel zet a lo kalpui tawh Mizorama zu khap burna dan 'The Mizoram Liquor Total Prohibition Act, 1995'  thlahdul /hlip a, dan thar, 'The Mizoram Prohibition Control Bill, 2014' putluh a tum chungchang an thlirho a. Zu khapna tihdanglam tum chungchang hi rei tawk tak an sawiho hnu-ah, MTA hminga thuchhuah siam ni se tiin, he an thuchhuah siam tur duangtu tur an inruat nghal bawk. Hei bakah hian, Mizorama Kohhran pawl hrang hrangte inpumkhat hleih theih loha awm chung-chang pawh ngaihtuahin, Council of Mizoram Churches emaw zawnga inpumkhat theihna tur lam hawi zirhona workshop /seminar buatsaih chung-chang an ngaihtuah niin thudawnna chuan a sawi.