Vawiin hi khawvel pum puia Museum hrang hrangten ni bik, mahni remchan ang theuha a ruala kan hman tlan tura Inter-National Council of Museum (ICOM)-in kum 1977-a a puan “International Museum Day” a ni a. Kum 2005 atang khan kum tinin he ni hi uar tak leh hlawk takin kan lo hmang ve tawh a, mipui a tam thei ang berin en man chawi lo va Museum an en theihna turin Museum hawn a ni thin a. Kum dang ang lo takin kumin International Museum Day hi Pathianni a lo ni hlauh mai a, naktuk May 19, 2014 (Thawhtanni) hian kan hmang dawn a ni a, Museum rawn en turin mi zawng zawng kan sawm a ni. Mizoram State Museum hi kum 1977 khan din a ni a, Mac Donald Hill, Zarkawt-a hmun laili leh thengthaw nuam tak, khawpui boruak ri hulh hulhin a tihbuai loh, hmun fianrial ni si-ah a awm a. Sunday leh Govt. Holiday bak hi chu mipui tana tlawh theiha hawn reng a ni. Thawhtanni (Monday) chawhma apiang hi Museum tihfai nan hman a nih avangin dar 1:00 P.M-ah hawn thin a ni a, tin, Inrinni hian chawhnu lam dar 2:00 thleng hawn thin a ni bawk. En man hi bithliah ve bawk mah se a tlem tham hle a, Puitling tan cheng 10/- a nih laiin Naupang tan chuan cheng 5/- chauh a ni thung a, kum 65 chin chung lam tan erawh chuan en man chawi a ngai lo a ni. School emaw, institution ten a huhova Museum an tlawhin en man hi 50 % conssesion pek thin an ni bawk. Museum hi chi hrang hrangah a then theih a, ram dang, ram hausate phei chuan Museum hrang tam tak an nei a, Museum pakhatah thil hlawm khat chauh an pho lang thin. Mahse, kan ramah ve thung chuan thil hlawm khat chiah entir turin hmun kan ngah loh mai bakah bungrua hlu leh hlui, tam tham tak hmun khat luah leng tur khawpa thahnem kan nei lo va, chuvang chuan tuna State Museum kan neih hi chu Multipurpose Museum a ni a, thil hlawm khat bik chauh pho chhuak lovin, thil tam tak, chi hrang hrang lakkhawmte, mi dangte hmuh theih turin pho lan an ni. Mizoram State Museum-ah hian thil tam tak hmuh tur a awm a, heng bungruate hi showcase hrang theuhah an nihna felfai taka tar langin leh kalhmang fel tak neia rem an niin Gallery hrang hrangah then a ni a, building chhawng chung berah Textile Gallery a awm a. Hetah hian kan Mizo incheina chi hrang hrang pho chhuah niin, Mizo hnam hrang hrangtena incheina an neih hran bikte, hunpui bika Mizo mipa leh hmeichhe incheina te, mutpuan chi hrang hrang la (raw cotton) atanga siam chhuah te, ipte, diar leh kawnghren te thlenga pho chhuah an ni. Hengte hian kan Mizo nun ziarang mite hmuhah a tilang chiang hle a ni. Kawrchei, Puanchei, Pawnpui, Zawlpuan, Naupuakpuan, Mizo Lal Kawr, Saipikhup, Tualtah kawr, Kharvar, Siapsuap, Gangte Kawr, Thihni Kawr, Them Bu, Iptepui, Mizo pa Kekawr, Chawngnu kawr, Dardawn diar, Lal puan te leh thil dang tam tak Museum-ah hian hmuh tur a awm a ni. Building chhawng chung ber dawttu-ah Ethnological Gallery a awm a, hetah hi chuan Mizoten kan khawsakna atana kan hmanrua neih hrang tam tak hmanlai ata tawh tun thlenga kan la hman te, a thente erawh hmuh tur awm tawh mang lote thlenga dahkhawm an ni. Hengte hian kan Mizo nun ziarang a pho chhuak chiang hlein a rinawm. Engtin nge an lo siam thiam zawk tih thlengin rilruah zawhna tam tak a lo luh phah fo thin a, kan pi pute lo themthiamzia min hriatchhuahtirtu ropui tak a tling a ni. Rimawi tumna hmanrua te, thil phurhna chi hrang hrang te, ladeh nana thil tul pawimawh tak takte bakah ni tin nuna pawimawh tam tak, a tel loa kan awm theih miah loh thilte tar lan an ni bawk. Tuium, Rawchhem, Hmui, Meitalhbawm, Siksil, Sumairia, Ngunhnam, Phaw, Setil Ip, Fairel Bel, Suvel, Tuiumbur, Chemkawm, Ladin lek, Lasai, Dawrawn, Hachhek, Zu No, No pui, Mualbeu te hian mit a ti tlai hle. Museum luh chiaha vei lam pangah hian History Gallery a awm thung a, Mizo thu leh hla thiam hmingthangte, zaithiamte, Mizo zinga a ber kai te, hmanlai Lal te, an lem thahnem tak tarlan a nih bakah Lung (Stone) chi hrang danglam tak tak, tui hnuaia awmte thlenga dah an ni a, hmanlai thlalak tam tak thlir tur a awm bawk. Mizote chu zai ngaina tak hnam kan nihzia te, Pasalthate kan ngaihhlutzia te leh Lalte, a khuate tana an ropuizia leh an ngaihsanawmzia te leh lehkha ziak mite kan ram tana an pawimawhna te chenin helai hmuna thlalak awmte hian min hmuhtir a ni. Ding lam pangah hi Anthropology Gallery tih a ni ve thung a, hmanlai in chhunga awm ngei ngei hmanraw hman tlanglawn, incheina atana an hman thin, ngun, thi, bengbeh, zungbun, diar chi hrang tam tak felfai taka remkhawm an niin, Zawlbuk, Mi naran In leh Lal In lem te thlenga mawi taka dah an ni bawk. Milu thi; Zahau puan; Dar selu; Chumchi; Chawngnu thi; Chawngpa thi; Pawi dar Zungbun; Tuikep kawnghren; Daibawl; Sahriak bur; Kawibawm; Tuithawl; Paihper; Saum Bur; Tlengtle Thi; Tuikuk Thi; Thir Vaibel; Belvuak fung thih te hi an hmuhnawm hle. Museum han luh chiah building hnuai lam han chhuk thlakin Natural History/Zoological Gallery a lo awm a, Mizo thang chi hrang hrang leh a kam dan te chiang thei ang ber tura tar lan an ni a. Gallery chhung han luh hian Mizoram leilung hi ramsa leh sava-ah te a hausakzia a tilang chiang hle a, a entute mit pawh a titlai thinin ramsa chi hrang hrang, sava te leh rul lam chi te bakah an ruhro te leh an ‘Ki’ tam takte thlengin hmuh tur a awm a. Vavu (Mizoram State Bird); Sahuai; Vahluk; Awrrang; Sakei; Lawi Ki; Tumpang Ki; Samang; Vakul; Saphu; Sial Ki; Sele Ki; Thangthleng; Buhchuk; Nghaawt; Aiawt; Sahdal; Sakuh thang te hian en a hlawh hle. Archaeology Gallery hi chu a tet tham deuh hlek avangin bungrua pho chhuah pawh a thahnem lo hle mai a, heti a ni chung pawh hian bungraw awm chhunte hian hlut an hlawh hle tho mai. Zamuang lung; Sukte hawrawp; Lersia lungtat; Pasaltha lungphun; Thinawhmamna Lung; Thangchhuahpa lung; Lungsum te hian en a hlawh em em vek a ni. Museum hi mipuite ta a nih anga a neituten a hlutna leh pawimawhna an hriat deuh deuh theihna turin hun pawimawh bikah en man chawi lova en theihna hun atana buatsaih thin a ni a. Mipuiin an hlut em em thin a, a bik takin zirlaiten an tangkaipui a. Tunhmain mi thenkhatin Museum hi thil hlui leh thil mak dahkhawmna satliah maiah an ngai thin a. Tunlai khawvel thang zel leh hmasawn zelah hian chutiang hmanlai ngaihdan ang ringawt chu a ni tawh hauh lo mai. Tunah chuan hnam nun zia - Culture leh Tradition kan hriat theihna bul ber a lo ni ta. Non-formal educational centre pawimawh tak, research scholar-te tan pawha chhenfakawm tak a lo ni ta. Kan hnam thil chuai leh mual liam tawha ngaihte chuai lo va an vul rengna hmun, ‘The past is kept alive for the future’ an lo tih chhan, hnam rohlu vawn himna hmun pawimawh ber a lo ni ta. Chuvangin, mi thiamte chuan Museum hi ‘Finna in’ tiin leh ‘Hnam tana finna khurpui’ ti hialin an lo sawi tawh a ni. Museum hlutna leh pawimawhna kan hriat deuh deuh theihna tura en man chawi lo va Museum en theihna hun siam, International Museum Day May -ah hian Museum rawn en ngei turin ka sawm che u a ni. - Lalchuailova Museum Curator Mizoram State Museum