Aizawl; Museum Week 24th-28th February, 2014 chhungin Mizoram State Museum tlawhtu 5454 an awm a, nikum aiin tlawhtu an tlem zawk a, an tlem chhan hi school naupang exam lai a nih an rin thu Museum thawktute chuan an sawi. Mizoram State Museum thawktute sawi danin nidangah chuan ni khatah tlawhtu chawh-rualin mi 30 vel an awm tlangpui a, mahse Week hman chhung hi chuan tlawhtu an thahnem hle niin an sawi a. A bikin naupang lamin an hlut zual niin an sawi. Museum gallery hrang hrang zingah ramsa dahkhawmna 'Zoology gallery' chuan mipui hlut a hlawh ber a, Mizo puan dahkhawmna 'Textile gallery' pawh thlawhtuten an hmu duh hle niin an sawi. Museum Week hi kum 2004 atang khan kum tin hman thin a ni. Mizoram State Museum hi kum 1977 khan Education Department hnuaiah a lo piang a. Kum 1989-a Education Department chu Department pathum i.e School Education, Higher & Technical leh Art & Culture Department-a then a nih khan Mizoram State Museum chu Art & Culture Department hnuaiah tun thleng-in dah a lo ni ta a ni. Museum-ah hian Gallery paruk – History, Anthropology, Ethnology, Textile, Zoology leh Archeology Gallery-te a awm a. Museum en man hi naupang tan Rs.5/- niin, puitling tan Rs. 10/- a ni a, school naupang zirtirtu hova en te chu a man chanve-a en tir theih a ni a. Puitling kum 65 chin chunglam te tan en man lak a ni lo. Museum-ah hian tun dinhmunah museum objects chi hrang hrang 936 pho chhuah mek niin, Reserve Collection Room-ah Museum objects 2768 dah that mek a ni a, tuna museum objects neih zawng zawng zat chu 3704 a ni. Museum tihchang-tlun leh tih hmasawn zel nana sorkar hmalakna kal zela New Secretariat Complex-a Museum Extension Building sak mek chu luah theiha peih fel tep a ni tawh a. Hemi atan hian sorkar laipuia Ministry of Culture atangin Rs. vaibelchhe 3.62 hmuh a ni a; Rs. nuai 62 chu Mizoram sorkar tum tur a ni.