American rock band My Chemical Romance chuan kum riat zet a vei hnuah hla thar an tichhuak ve leh ta. An hla thar hi 'The Foundations Of Decay' tih a ni a, sawi lawk awm loin fans te surprise nan an rawn hmang a ni. 

Member pali - Gerard Way, Ray Toro, Mikey Way leh Frank Iero te awmna My Chemical Romance hi an reh rei ta hla mai a, hla thar nen an rawn kir leh ta hi chanchin lawmawm tak a ni. 'Welcome to the Black Parade' hitmaker te hian kum 2019 khan Los Angeles-ah show an nei a,  hemi hnu hian Australia, New Zealand leh Japan te an hrut leh bawk. January 2020 khan North American leh European tour an neih tur thu an puang leh a, mahse covid-19 avangin an thulh leh a nih kha. 

'The Foundations Of Decay' hi 2014 hnua an hla tihchhuah leh hmasak ber a ni a, an zai ngainatute tan chuan  a hlu khawp ang le. My Chemical Romance hian kum 2014 khan 'Fake Your Own Death' an tichhuak a, hei hi band anga an hla tihchhuah hnu hnung ber tur a nih thu an frontman Gerard chuan a lo sawi tawh a ni kha.