DOWNLOAD OUR APP

Read latest news on your phone
app-store

Myanmar-a India palai lo zin; Zokhawthar tlawh

Feb 15, 2014

Myanmar-a India palai lo zin; Zokhawthar tlawh

Aizawl; Myanmara India palai Gautam Mukhopadhaya chuan Zirtawpni khan Aizawl a rawn thleng a, mi pawi-mawhte a kawm hnuah nimin khan India leh Myanmar insumdawntawnna hmun tur Zokhaw-thar a tlawh. Myanmar-a India palai hian Aizawl a lo thlenin Parliamentary Affairs Minister R Romawia, Chief Secretary L Tochhong leh Chief Information Commissioner Lal Dingliana te chu tlawhin thil pawi-mawh a sawipui a. Hemi hnu hian Trade & Commerce Secretary B Lal-hmingthanga leh a thawhpuite bakah Mizoram Chamber of Commerce leh Mizoram Chamber of Industries a hotute chu Mizoram state Guest House Conference Room ah kawmin Indo-Myanmar Border trade a hmalak chhoh dan tur a sawipui a ni. Ambassador chuan a rawn kal chhan ber chu Mizoram chhung leh ramri te hriat chian a duh bak ah India leh Myanmar inkara sumdawnna kawngpui a Mizoram hman tangkai dan tur kawng hrang hrang te rawn belchiang a nih thu a sawi a. Trade & Commerce hotute ngenna anga Zokhawthar a land Custom station, Mizoram sawrkar in hawn mai theih tura a peihfel tawh chu ataka hna a thawh theihnan Myanmar sawrkar ah tihtur tul te bawhzui sak a tiam a. Sumdawng ten harsatna an tawh thin dan te ngaithla in a tul anga a tanpui tur thu a sawi a. Mizorama sumdawngte pawh Indo-Myanmar Trade an chhawr tangkai theih nan Myanmar a hralh kal deuh te thlan chhuah kawngah ngaihtuahna seng se a tangkai hle a rin thu a sawi. Zokhawthar hmuna sumdawnna a lo len zawk nan Rih-Tiddim-Kalymyo kawngpui chu India in a pawi-mawhna a hria tih sawiin kawngpui hi siam thuai a nih theih nan chak takin hma a la mek a ni a ti a. Mizoram ramri hrula khaw thenkhatte pawh border trade hmun atana a remchan dan tur te pawh ngaihven reng anih thu sawiin Kaladan Multi-modal Transit Transport Project pawh a hun remchang hmasa ber ah tlawh a tum thu a sawi a ni.
Share now