July 18,2022; Champhai District Lirthei Inzawmkhawm Pawl (CPDLIP) ten June ni 3, 2022 zing dar 6 atanga Myanmar atanga dan loa Mizorama bungraw lut tur leh Champhai atanga chhuak turte tiamchin awm loa an dan chu la chhunzawm zelin, naktuk-ah an kal zel dan tur an ngaihtuah dawn a. Mizoram sawrkar chu danlo a bungraw rawt lut chungchanga a dinna tichiang turin an phut.

CPDLIP chuan Mizoram a dan loa bungrua rawn lutte chu zalen takin a kal thei lo a nih pawhin chhiah fel tak sawrkarin siam se an duh a, chumi tur chuan sawrkarin a dinna tichiang se, dan loa lolut rau rauah thleibik awm lo se an duh. "A then dan loa an kal theih laiin, a then dan lo an tih vek kal theih tlat loh ang chi te awm loin, kaltlang dial dial i la, district dangah te pawh min lo khak buaitu awm bik lo se kan duh," tiin CPDLIP hruaitute chuan ZALEN an hrilh.

Naktuk chawhma dar 11 ah executive meeting neiin, an kal zel dan tur an tichiang dawn a, tuna an beisei chu, sawrkarin aw chhuahin, a dinna tichiang se an duh, chu chu an hmu lo a nih chuan an hmalakna chhunzawm zel an tum. Meeting an neihna tur hmun an la tichiang lo a, an tum danah chuan Ruantlang emaw, Mualkawi emaw a ni ang.

CPDLIP te hi hmun hrang hrang, Khankawn, Zote, Ngur, Hnahlan, Diltlang, Vaphai, Sesih, Khawbung, Mualkawi, Melbuk leh Ruantlangah te an duty a, bungraw lo dan tur tawk awm mah se, mipui lamin thu an awih a, harsatna siam an awm lo.

CPDLIP hruaitute chuan, June ni 13 a duty an kalpui tan atanga thil hmuh chhuah an neih chu Mizoram intodelh loh zia te, dan loa bungraw lolut hmanga eizawng/sumdawng kan tam ziate a nih thu sawiin, "Dan loa bungraw lolut tello chuan sumdawngte kan khawsa lutuk thei lo tih a langchiang," an ti bawk.