Aizawl: Nimin chawhnu khan MZP Zofest vawi 8-na hmanpuia lo zin, Myanmar MP pahnih Pi Khawtinsiami (Ebenezer Siami) leh Dr. Riangvela te chuan MJA sawmna angin Aizawl Press Club an tlawh a, MJA member-ten lo dawngsawngin Aizawl Press Club room hrang hrang fanpui an ni.   Thingpui inho paha inkawmhona hun tawi neihah MP pahnihte hnenah hian MJA hruaitute chuan MJA-in Zohnahthlak hnam hrang hrangte inpumkhatna a ngaih pawimawh thu leh chumi atan chuan tun hma deuh atang tawha hmalakna pawh a lo neih ve thin thu te an hrilh a, Myanmar ram Parliament a Zohnahthlak MP 25 lai an awm ve ta leh Myanmar Vice President ah Zohnahthlak pa ngei neih a ni tate chu MJA hruaitute chuan lawmawm an tih thu thlamuanthlak an tih thu MP pahnihte hnenah hian an sawi bawk a. Zohnahthlak hnam hrang hrangte inpumkhatna atana an beina kawngah MJA-in tangkaina a neih dawn chuan a inhuam reng thu Myanmar MP-te hi an hrilh bawk. MJA hruaitute hian Mizoram Journalist-ten hun remchang hmasaa Myanmar hmun thenkhat - Khampat Bungpui, Tahan leh hmun dangte tlawh theih an châk thu MP-te hnenah hian an sawi a. MJA hruaitute hian MP pahnihte hi ram rawng an bawl zelna turah duhsakna an hlan bawk a ni. &&&&&