Aizawl; Myanmar ram buai avanga refugee Mizoram a rawn lutte enkawl nan Mizoram sawrkarin cheng nuai 380 a hmang tawh a. 12.2.2022 thleng raltlan 24,289 rawn lut an awm tawh.

Assembly budget session neih mek ah C. Ngunlianchunga zawhna Home minister Lalchamlianan ziaka a chhan danin, 12.2.2022 dinhmun angin raltlan rawn lut zawng zawng 9,033 te chu refugee camp a awm an ni a, a dang 15,256 te chu hmun danga awm an ni.

Refugee te enkawl nan Mizoram sawrkarin cheng nuai 380, DC te kaltlangin a pe chhuak tawh a. Hemi hmang hian refugee camp te sak a ni.

Refugee camp a eng pawh luh nan te, tui dah khawlna tur leina atan te, ek in (Pit latrine) sakna atan te, thawmhnaw lum, mutbu bakah sumfai a tanpuina atan te, medical care atana inenkawlna atan te, ei leh in leina atan te, Myanmar refugee zinga MP leh MLA te tanpui/chhawmdawl nan te leh raltlan te enkawlna tura DC te hma lo lak tawhna sum mamawh phuhruk nan te sem chhuah a ni.

Serchhip bialtu MLA Lalduhoma zawhna chhangin Home minister Lalchamliana chuan, tunlai a Pearlvine hminga Serchhip a pung sang tak nei a pawisa deposit kalpui mek chu mipuite tan a rintlak lova hriat a nih thu leh, chhui tawh chinah member 119 an inziak lut tawh tih a sawi a, hmun danga hmalakna an neih dan pawh chhui mek zel a nih thu a sawi.