Aizawl April 11, 2024 : Union Minister for External Affairs S. Jaishankar chu chanchin thehdarhtuten an kawmnaah Mizoram, Manipur leh Nagaland-a Myanmar ramri hung tum chungchang zawh a ni a, Tun dinhmunah hemi chungchang hi zawhna awm tak nia a hriat thu a sawi a, ram dinhmun thlirin he hmalakna hi mipuite pawhin an hriatthiam a ngaih thu a sawi.

S. Jaishankar chuan, "Heng ramri hrula cheng te duhdan hi kan ngaichang reng a, nunphung, kalphung leh sakhuah te an inhnaih a, inkungkaihna tha tak an nei tih pawh hriat a ni. Foreign minister kan nih ang leh home lam pawhin ramri hung piah lama ramri-a zalen taka inkalpawh chungchang thlengin kan ngaihtuah a, amaherawhchu tunah Myanmar ram a buai em em a, roreltu mumal pawh an awm hleithei lo a ni ber a, dan lova chetna a tam em em a, chuvangin kan ram, kan state te himna hi kan ngaihtuah a ngai a, hma kan lak a ngai a ni," a ti.

Union Minister chuan, "Kan hmalam hun tur hi kan ngaihtuah a ngai. Kan thenawm ram te hian harsatna namen lo an tawk si a, kan himna tura hma kan lak hi hi a ngai si a ni. Myanmar hi sawrkar pangngai anga kal kha chu nise hetiang hmalak hi a ngai lovang, chuvangin mipuite pawh hian kan hriatthiam a ngai a ni," a ti bawk.

Hetihrual hian Union Minister chuan Myanmar lam nen insumdawn tawnna tha a awm theihna turin hmalak mek a nih thu sawiin, "Mizoram atangin Sittwe thleng turin hmalak mek a ni a, Manipur lamah pawh hmalak a ni bawk a, mahse, Myanmar buaina avangin duh angin hma a lak chak theih lo a, theihtawp chhuah a ni. Myanmar mai ni lo ASEAN ram ten Sawhthing an mamawh em em a, inkalpawhna tha a awm theihna turin sawihona kan nei reng," a ti bawk.