ZALEN December 10, 2024 : Sawrkar laipui chuan Myanmar ramri kilometre 1643 a thui chu hung tumin hma a la tan a, Border Road Organization (BRO) chuan kum 10 chhunga zawh hman an tum.

He project ramri hungna tur atan hian Cheng Vaibelchhe 20,000 vel hman tura ruahman a ni a, vaibelchhe 11,000 vel ramri kawng siamna tur hian hman tura ngaih a ni bawk.

Army lam chuan heng border fencing Km 1,500 chuang hung turah hian Myanmar-India ramri him leh zual a nih theihna tur chuan Km 300 zet chu Electric fencing a ngaih tur thu an sawi.

Ramri hung tuma hmalakna hi Manipur a Kuki-Zomi leh Metei te inkara buaina chhuak, mi 250 chuang thihna avanga nunphung pangngai a la awm loh laia hmalakna a ni. Chutihrual chuan Myanmar ah sawrkar mumal a awm theih mai besei lohna avanga hmalak niin thulakna chuan a tarlang bawk.

Hetihlai hian Myanmar nena inrina nei, Nagaland, Arunachal Pradesh, Manipur leh Mizoram lam te chuan ramri hung duh lohna hi an duh loh thu an sawi reng a, ramri a awmte zalen taka an inkalpawh phal sakna dan, 'Freedom movement Regime' tihtawp phei chu an duh lo hle. Kumin kumtir lam thleng khan ramri a mi te hi chu Km 16 a thuk thleng an inkalpawh thei a ni.

Kuki bakah Myanmar ramri a cheng hnam hrang hrangte chuan he hmalakna hi hnam Nunphung, Kalphung leh hmanlai nun tih derthawnna tiin an lo sawi tawh thin a ni.

Mithiam te chuan he hmalakna hi sum khawhralnaah an ngai a, ramria awmte inlaichinna tichhetu tur leh inhnaihna tihlatu mai tura an ngaih thu an sawi a, thil tha lo zawk thleng theiah an ngai.

Defence lam chuan he ramri hung hian civil mi te inlaichinna leh inkalpawhna lam chu a tihbuai loh tur thu an sawi thung.

Biometric system hmangin inkalpawhna hi paltlang theih tura ruahman niin sawi a ni a, hemi tur hian ramri enkawltute leh tualchhung thuneitute phalna erawh a ngai tura ngaih a ni.

Ramri hung hi hel pawl khuahkhirh tumna bakah dan lova sumdawnna hrang hrang khuahkhirh tumna niin sawrkar laipui chuan an sawi.